高雄 - 絕對穩陣牛肉麵 - 艾笠私伙遊記

其實港園牛肉麵已經成為我地高雄必到景點~ 所以一直都無寫遊記介紹~ 後黎老闆娘提醒~ 果度靈光打到我應一應~ 係喎~ 我知司機知你地未必知~ 說好的不藏私~ 有好野大家食~

港園牛肉麵
地址 : 鹽珵區大成街 55 號
電話 : 07-5613842
營業時間 : 10:00am - 8:00pm

自從我由墾丁搬到高雄之後~ 一直努力開發多 D 啱玩嘅高雄景點~ 唔經唔覺響高雄又住左差唔多兩年喇~ 期間帶過唔少旅客黎食港園~ 接受度 100% 有讚無彈~ 除非唔食牛啦~ 咁唔食牛我唔會帶你去食牛肉麵架麻~ 哈哈~

港園屬於鹽珵區老店~ 平時食飯時間車水馬龍~ 客如雲來~ 玩法係直闖入櫃檯點餐先~ 有位佢會叫你坐架喇~ 咁點解相中無人呢?! 因為星期一高雄係大部份地方都休息的~ 港園年終無休~ 不過星期一好少人出黎搵食~ 加上仲要三四點先黎~ 所以唔洗排隊~ Yeah~

牛肉乾亦係重點之一~ 買透明袋果隻就好~ 以前有任達華張相添架~ 依家唔知攪咩無左~

價錢響高雄唔算平架喇~ 不過接受到~ 唔算好誇張~ 所有麵都有分乾麵同湯麵~ 乾麵比較受歡迎~ 不過我自己鍾意食湯麵多 D~

小菜咁樣就 NT$150 略貴~ 同埋唔係話特別好食~ 可以 skip~ 反正鹽珵區大把野食~ 唔會餓親的~

此為乾麵~ 有個湯另附的~ 但碗湯同湯麵個湯又唔同架喎~ 真係神奇~ 乾麵個湯係骨湯黎~ 比較清~

此為湯麵~ 湯係牛肉湯~ 比乾麵個骨湯重口味少少~ 但比外面其他牛肉麵個湯清好多~ 係食到牛肉湯嘅清香~ 食到係用牛肉煮出黎嘅味道~ 唔係靠其他調味搭夠的~

台灣人比較鍾意食乾麵版~ 但係我帶香港人黎食都食湯麵多~ 可能係比我影響左~ 又或者真係口味有偏差啦~ 大家不妨兩個都試下~

仲有佢嘅調味都幾特別~ 係蒜容同辣椒~ 辣椒唔係好辣的~ 不過我食麵就好少加呢 D 野~ 我鍾意食原味湯~ 麵份量好夠~ 以我同賤內嘅組合~ 一個乾麵 + 牛肉湯~ 剛剛好~ 行多個景點再過鼓山食 Tea 確係 fit~

平日門口都停滿 BMW 同 Benz~ 都係老闆級黎食晏的~ 就係門口長期停滿車~ 依家警察會黎捉架~ 高雄係好少抄牌的~ 直接成架拖走~ 就算你出得切黎~ 都影相罰錢的~ 所以自駕的話請足停停車場比較安心~ 除左老闆娘所講嘅福容飯店可以停~ 大成街直行到底仲有個大型露天停車場~ 唔難搵位的~ 行多幾步食得安心 D~

同場加映典型台灣故事~ 分家傾唔掂數~ 三媳婦響五福路又開間一樣嘅~ 何必呢~ 背後有咩故事就唔清楚~ 我亦無試過三媳婦店~ 食開老店有感情~ 就算排隊我都會排的~

三媳婦好有決心~ 開埋二樓仲大過老店添~

總括黎計港園係高雄搵食萬無一失之選~ 重點係唔洗食太飽~ 同埋佢除左牛肉~ 其實豬腳都好出名~ 但係入 KFC 唔係叫薯條食下麻~ 識食梗係食牛肉麵啦~ btw 停車嘅福容飯店~ 阿基師酒樓亦係一絕~ 點心好食過香港~ 係我常去嘅思鄉蒲點~ 有帶老人家怕台灣野唔岩口味的話~ 亦係穩陣牌之選~ 仲有好多我唔知你地知唔知~ 但係我地包車日日都去嘅景點~ 我會努力整理埋佢出黎俾大家睇㗎喇~ 希望大家繼續支持~ 玩得開心 D~

艾笠墾丁 2 - 40人專業台灣包車服務, 免費行程安排, 可指定香港人導遊