艾笠話你知 - 台幣唱錢攻略

都係o個句啦~ 大家黎玩就梗係要洗錢~ 出國旅遊外幣匯率點都要關心下~ 到底要唱幾多錢~ 去邊唱先抵~ 等我黎同大家分享下~

好多朋友成日問~ 到底要預幾多錢~ 台灣消費一般比香港低~ 如果住宿同包車已經俾左錢~ 咁就淨係計自己洗費就夠玩喇~ 食飯行夜市真係有限錢~ NT$500/人頭一餐算好充裕架喇~ 買手信各樣就自己因喇~ 市區大部份地方都可以用信用卡~ 唔好以為墾丁係旅遊區一定可以碌卡~ 去 d 咁親親大自然既地方係要玩現兜兜的~ 所以講左咁耐都係好難預算呀呵~ 哈~ 唱多左最後唱返轉頭一定蝕架喇~ 除非你經常黎台灣啦~ 匯率會變動~ keep 住響餅罐未必有著數架~

如果大家一大棚人黎~ 夾埋一齊唱 HK$5000 以上的話~ 咁可以 check 下香港中環百年找換店~ 匯率算好穩陣~ 不過響中環就要睇你就唔就腳喇~ 如果唱 HK$2000-3000~ 隨時坐車過海車錢都蝕埋~

百年找換有限公司 (有每日匯率睇)

中環德輔道中 61-65 號華人銀行大廈 1703 室 (萬宜大廈鈄對面;中信銀行國際樓上)入口於7-11 便利店右面

營業時間:星期一至五上午九時三十分至下午三時三十分(下午三時三十分至六時正 - 只限已預訂交易)

星期六: 上午九時三十分至上午十一時三十分 (上午十一時三十分至下午二時正 - 只限已預訂交易)

TEL: 2523 3403

高雄機場羅完行李仲響禁區裡面就有銀行可以唱錢~ 不過唔洗急~ 一般個個都淆底~ 響裡面起勢咁排隊~ 其實出黎仲有兩間銀行~ 匯率差唔幾~ 但係唔洗排隊先~

台灣銀行匯率 (睇現金買入)
兆豐國際商業銀行 (現金買匯~ 唔太準~ 只可以參考)

高雄機場兩間銀行匯率都係隨時變~ 到左睇牌最準~ 不過點計~ 到左台灣先唱都有著數~

如果同我一樣只係散戶~ 建議黎到台灣機場唱 d petty cash 就 ok~ 半路發現唔夠洗~ 可以去 7 仔禁機~ 係咪好方便呢~ 不過大家出發前要先確認幾樣野~ 依家就黎一齊睇下~

首先梗係要確認下自己有無提款卡先啦 (爛左 d 唔好意思)~ 哈哈~ 重點係反轉佢睇下張卡有咩 Logo~ 表示支援咩野提款服務~

大家應該都知~ 依家換晒晶片卡~ 以前可以用 PLUS 國際提款~ Sorry 依家你鍾唔鍾意都只能用 "銀聯"~ 其實除左殘體字衰相之外係無咩唔好的~ 手續費仲比 PLUS 平 d 添~ (禁完錢去買野禮貌 d~ 唔係人地以為你係陸客呀~)

國際提款手續費如下 (每次計):

HSBC HK$20 (即係香港匯豐卡去返台灣匯豐機禁錢~ btw 台灣匯豐極難搵~ 匯率亦唔靚仔~ 可以不理~)
PLUS HK$25
銀聯 HK$15 (online banking 會一樣話係 HK$20 Fee~ 我打過去銀行問~ 話國際提款就係 HK$20~ 真係有 feel~ 大陸只有假貨係真~)

每次最多可以領 NT$20,000 唔夠可以禁多次~ 手續費當然亦扣多次啦~ so far 計埋假狗手續費後都無蝕~

實例 :
當日台灣銀行匯率 3.761

同時我唔理咁多去 7 仔就禁 NT$20000
最後 online banking check 返~ 總數扣 HK$5150.3~

NT$20000 / ( HK$5150 - HK$20 手續費) = 3.898 (實際匯率)

至於可以羅幾多就睇你 set 每日海外提款 limit 有幾多喇~ 咁要點 set 呢~ 有以下幾種方法~

1. 香港銀行櫃員機 (離開香港就無得攪架喇~ 請攪掂先出發~)

其實都更新好耐喇~ 所以大部份 ATM 都會有呢個分唇~

一般建議開盡佢~ 有備無患~ NT$20,000 (約 HK$5200-5300 連手續費~ 即係至少可以一日禁三次~ Total NT$60,000) 正所謂錢到用時方恨少~ 禁起上黎唔夠 quota 就要等第二日先可以復活喇~

仲可以 set 幾時先生效~ 一般唔洗煩~ 直接 "即時生效"就 OK~

幾時取消海外提款就睇你黎玩幾耐喇~ 要 d 智慧先攪得掂架~ 你知總有個高手企你後面俾壓力你架啦~ 做定功課先好埋位呀~ Shooter Ready?!

攪完就 OK 架喇~ 可以放心去玩 lu~ 順手可以 ATM 買埋旅遊保險啦~ 一百幾十蚊買個保障~ 不過條款就間間銀行都唔同~ 詳情都係自己問清楚好 d 喇~

2. Online Banking 網上銀行

如果怕俾人白眼~ 梗係呢響屋企慢慢摸會好 d 啦~ online banking 要注意你開緊邊個 account 喎~ 你知依家一個 account number 九十幾種貨幣~ 又分 saving account 同 current account~ 揀錯都幾頭痕~ 所以要清楚自己張卡係 default 羅邊個 account 既錢~ 因為台灣唔係部部機都有得揀~ 當然最好唔好用 credit card 做提款啦~ 以免揀錯預借現金~ 多俾利息就唔好喇~ 如果淆底~ 其實到台灣提款時~ 可以唔洗咁急羅錢住~ 先用部機 check 左可用結餘先~ 睇到係邊個 account 有幾錢先禁就萬無一失喇~

3. Apps (Mobile Banking)

iTunes

Google Play

最後關頭救你一命既~ 可能就係你部電話~ 只要上到網~ mobile banking 攪一攪~ 咁你又有錢洗喇~ 你話幾咁美好呢~ 用電話就要小心 data roaming~ 建議大家出發前都裝左個 app 先~ 因為我係試過禁完唔出錢但係照扣數架~ 所以禁完錢可以即時 check 返到底扣幾多~ 有錯就要襯早處理~ 雖然講到好似好唔穩陣咁~ 但係我玩左幾年~ 無一千都至少禁過幾百次錢~ 只有一次出現以上面青情況~ 如果大家真係咁好彩撞正~ 我經驗係先記得要 keep 返張收據~ 如果係 7 仔請問清楚店員~ 該店正確地址~ 因為銀行要知機號~ 有地址佢就有辦法查~ 最好即刻用電話響櫃員機面前影張收據留念 (係做證先岩)~ 咁就有埋正確日期時間~ 跟住打返香港自己銀行報案~ 等佢退錢~ 然後去搵投注站買張刮刮樂衝一衝喜~

事前準備攪掂晒喇~ 咁真係實戰要禁錢時有咩攻略咁巴閉呢~ 係因為台灣每間銀行換港幣既匯率都唔一樣~ 一黎每一日都會浮動~ 二黎現金買~ 現金賣~ 電匯買~ 電匯賣~ 各自都有匯率~ 簡單講就係睇現金買入~ 就知你 HK$1 可以換幾錢台幣喇~

同香港一樣當然唔同銀行有各自既櫃員機啦~ 所以禁錢前睇睇係邊間銀行既機~ 就知睇邊間銀行既匯率先岩喇~ 至於邊間最抵呢~ 基本上每日都要 check~ 但係最方便最穩陣就係去 7 仔~ 中國信託銀行匯率都非常理想~ 就算唔係最高~ 亦唔會要 dum~ 絕大多數時間比機場匯率仲要高~ ATM 嘔出黎仲唔怕有假銀紙添~

中國信託銀行即時匯率

長篇大論原來都係濕碎野~ 相信都難唔到大家~ 咁黎玩洗錢就無壓力啦~ 其實攪左唔淨止台灣用架~ 因為係國際提款~ 我去日本都係咁禁~ check 過匯率都係差唔多~ 所以唔洗下下袋到周身都係錢~ 又怕俾人老笠又盛咁~ 洗晒唔夠先再禁~ 你知 7 仔總有一間響左近~ 真正淡定有錢淨~

另外提醒大家台灣只有銀行同郵局係合法唱錢~ 當然有唔合法既地方匯率比較高少少~ 例如什麼銀樓呀~ 司機私下同你唱呀 (機場有警察會捉架)~ 但係風險就自己承擔喇~ 台幣假鈔唔多~ 但唔係無~ 建議唔好貪小便宜~ 以身試法~ 穩陣 d 好~ 最重要係衰左無仇報真係好唔開心的~ 哈哈~

仲有大家黎百貨公司買野的話~ NT$3000 以上係可以退稅 5%~ 買野前要同 sales 講退稅~ 請佢幫你填退稅單~ 再到百貨公司服務台辦退稅~ 攪一攪小則 30mins~ 閒閒地攪成粒鐘~ 講堅的~ 大部份手腳極慢~ 要退稅既商品到機場要再到退稅櫃台俾佢 check~ 所以除非你買十幾萬紅珊瑚啦~ 唔係棧攪~

外籍旅客購物退還營業稅之特定營業人名冊

以上都係俾大家參考~ 銀行呢 d 牟利 (機構)~ 規矩成日改~ 不過依家資訊發達~ 要查其實唔難~ 我會盡量跟上潮流尖端同大家 update~ 有錯有漏請提醒~ 大家玩得開心 d~

艾笠墾丁 2 - 40人專業台灣包車服務, 免費行程安排, 可指定香港人導遊

HK Tel : 81700438

Email : info@iLoveKenting.com

Web : www.iLoveKenting.com

Facebook : http://www.facebook.com/iLovekentingHK