台南 - 市區景點一日遊行程
台灣近年一直好努力推動觀光業，方向啱唔啱我就唔識分，我淨係知有無野玩。台南距離高雄約 1Hr 車程，可以即日來回亦可以住返晚玩得有深度 d，但係要了解多 d 台南嘅地理位置，高雄出發係要向北行，墾丁就向南，所以高雄係中間位，行程安排上要就一就啊。
台南市區一日遊行程:
奇美博物館 (需預約) > 四草生態遊綠色隧道 > 夕遊出張所 (生日鹽) > 安平樹屋 > 安平老街 > 虱目魚主題館 > 神農街 (阿朗基餐廳) > 林百貨 > 回程高雄瑞豐夜市／台南花園夜市
以上係比較大目標嘅景點路線，適合未去過台南嘅朋友先玩一玩，如果已經去過台南，或者對市區行程麻麻地的話，就建議你地玩台南北部行程了。
奇美博物館我自己非常推薦，有興趣最好提前三個月好去搶定飛，撲唔到飛可以現場睇有無後補，就算入唔到場響門口行下影張相亦好正，有同我去過嘅朋友都知，我又有故仔講你聽，因為我真心欣賞許文龍先生嘅理念，係我心目中台南必去嘅地方。
四草生態遊係台南膽拖，亦係好多媒體列入台灣秘景之一，綠色隧道真係好靚，坐船仔有非常專業嘅導覽人員解說，旁邊大眾廟亦有段故，帶小朋友睇靚景睇生態仲有歷史文化可以睇埋，無理由唔去的。
詳細遊記 : http://ilovekenting.blogspot.tw/2014/04/mini.html
夕遊出張所個名係就係橋口 d，但佢係返入安平區順路嘅景點，保留日式建築值得行下，賣嘅小禮物亦幾有意思，好過下下都寄木頭名信片。
之後安平樹屋又係響隔離，假期封路車唔俾行，大家就要行多幾步路，順便行埋安平老街，至於安平古堡我就唔太建議，因為裡面真係無咩睇，鍾意睇古蹟的話可以去億載金城，有好大碌巨炮睇又城牆又盛咁，好過去古堡要佢回水。
另一個台南好出名嘅小食叫棺材板，莫講話呢 d 路邊攤，台南始創店我都食過，個人評語係方包+海鮮忌廉湯，講完，可以不理。
認住永泰興招牌，唔好走錯過隔離呀，同埋佢依家響安平路就有鋪頭，大 d 無咁逼，所以行唔行老街就真係睇個人喇。
老街有條橫街行入去有間叫山海館嘅地方，橫街裡面慢慢亦熱鬧起黎，有 cafe 有賣古董玩具嘅特色小鋪，行得老街就多花幾分鐘行下喇。
跟住又上車玩下一站喇，虱目魚主題館幾得意㗎，同埋虱目魚係台南名產，館內有好多現成野賣，如果想食虱目魚餐，就要玩下台南北線喇，個虱目魚一夜乾真係一試難忘，講起都肚餓。
我自己幾鍾意神農街，台灣嘅歷史其實都離唔開被殖民，所以有好多唔同嘅文化已經融入左呢個地方。神農街保留左唔少全木老房，最近台灣政府亦鼓勵神農街將老房活化，有唔少特色小鋪同小餐廳，黎台南就係要慢活，花 d 時間俾自己慢慢發掘，別有一番風味。
神農街裡面有間阿朗基餐廳，係日本高人氣插畫品牌，台灣取得正式授權，台北同台南都有分店，呢間亦係台灣唯一阿朗基主題民宿，同樣係用老房活化改成民宿。
有時候真係抵日本仔發達嘅，佢 d 野除左個樣無得輸之外，都真係幾好味架，不過阿朗基好似響香港無人識，捧唔捧場就自己斟酌喇。神農街出面條海安路都好野黎架，好出名嘅藍晒圖幾經風雨之後，最近又可以復活喇，海安路亦係台南老蘭黎，愈夜愈精彩啊，不過戴定頭盔講你聽係台灣風呀下。
行一行襯天未黑，可以行埋個林百貨先，百貨公司只係佢嘅外表，實質佢底蘊係一座古蹟黎，1932年到依家，算係台灣第一間百貨公司，裡面部電梯亦係南台灣第一部電梯。
雖然話係古蹟，但係裡面賣 d 野我覺得幾潮架，好似佢地書局部份有日治時期嘅地圖，亦有好多台南景點相關產品，有興趣認識府城多 d 的話，一定要黎睇下。
記得一定要上天台睇下，係全台灣唯一有空中神社嘅地方，點解會有舊咁嘅野呢？連林百貨佢自己都唔知，點解要起同用黎做咩都係一個迷，簡直就係天使同魔鬼嘅化身。
頂樓間關東煮叫大手燒，連鎖的，價位以關東煮黎講算貴，小西門又有，高雄又有，對我黎講無咩吸引力。
依~ 乜講到尾都無講食飯位嘅呢？放心，梗係有準備啦，安平就有條美食街了，依家愈黎愈多知名食店都集中響呢條街上面，地點正中，所以睇大家幾時肚餓咪幾時去食囉。
台南必食周氏蝦捲，又係成個台南都話自己係蝦捲乜乜乜啦，不過識食一定係食周氏，假期爆硬，好在我地食飯時間同台灣人有分別，可以避一避。
推薦菜式 : 擔仔麵、米粉湯、虱目魚丸湯、蝦捲
唔好諗，行過即買義豐冬瓜茶，消暑一流，古法製唔同一般用糖水開出黎，高雄有分店，但只有台南老店先有冬瓜糖賣，可以跟佢份量返去自己煮，夏天雪櫃一定要有。
所長茶葉蛋必食，NT$12 一粒茶葉蛋去邊度搵，辣味唔係好辣㗎咋，有冬瓜茶旁身無有怕，同埋老闆真係警察所長黎㗎，可以花 d 時間睇下佢嘅故事。
如果有帶長輩或者小朋友，想食正餐 d 嘅正餐，又有位坐得舒舒服服的話，推薦大家試下錦霞樓，係老店阿霞飯店嘅分店，係傳統正宗台灣流水宴，搬入餐廳俾大家試下，有興趣記得預早同我地講幫你 book 檯，佢地每道菜份量亦有返咁上下，所以唔好喪叫，台灣人喜宴最重排場，預左大家打包攞走的。
推薦菜式 : 紅鱘米糕、招牌甜湯
如果大家嫌阿朗基太卡哇宜，又想體驗下台南慢活方式，窄門咖啡真係好適合文青們黎個 tea。
有圖有真相，應該唔洗問點解叫窄門啦下麻。
台南有唔少特色 cafe，等我地慢慢去發掘，我地咁玩其實只係走馬看花，真正體驗慢活，可能真係要響台南住返一年半載先有辦法。
仲有赤崁樓呀、孔廟呀、成功大學呀、百年老茶行呀、手工帆布袋專賣店呀、只要 NT$2 一串嘅地道小食黑輪呀咁，大家可以加減玩，總之就咁一睇就知，只會唔夠時間玩，唔會無野俾你玩，如果你去過台南覺得好悶無地方行，咁你可能需要一位導遊帶你玩，絕對同你自己四圍中係兩回事，一個價錢包車仲包埋個導遊俾你，真係物超所值啦，記得搵我地訂車喇。
艾笠墾丁 2 - 40人專業台灣包車服務, 免費行程安排, 可指定香港人導遊
HK Tel : 81700438
Email : info@iLoveKenting.com
Web : www.iLoveKenting.com
Web : www.iLoveKenting.com
Facebook : http://www.facebook.com/iLovekentingHK
台南 - 市區景點一日遊行程
Reviewed by Unknown
on
下午7:54:00
Rating:
Reviewed by Unknown
on
下午7:54:00
Rating:
沒有留言