台南 - 台南北線一日遊行程 (深度旅遊推薦)

台南其實有好多玩法，今次同大家玩深入 d，有幾入呢？入到隔離就係嘉義喇，所以如果大家係從南玩到北，又或者想去台灣四大溫泉之一嘅關子嶺住返晚，又或者台南市區行程已經玩過，但又好鍾意台南慢活感覺的話，呢條路線就值得大家玩玩佢。

從高雄出發直接去到台南科技園區都係 1Hr 車程左右，可以參觀下南部科技工業重鎮，區內唔係我地想像中咁污煙瘴氣的，唔信你睇。

如果大家有排 iPhone6s，咁應該對台積電唔陌生，呢個幾米藝術小公園就係台積電攪架喇，區內設有員工宿舍提供一個好正嘅居住環境俾呢班高薪厚職嘅工程師。所以會見到好多五星級的家，同埋唔少貴族學校，玩台南黎碰下運氣，睇下有無某某高層睇得中我，草我回家。

雖然我狂 band 七股鹽山，但其實七股都有值得去嘅地方架，台南七股好多蚵農 (唔係柯南啊)，養蠔係佢地嘅職業，佢地有攪觀光船帶你出去兜個圈，然後燒蠔任食。係咪好吸引呢，不過我就唔想同旅行團一齊玩，所以留響岸上自烤蠔食，NT$400 一盆連工包料，自助自燒自己拆黎食。

d 蠔就唔係話好大隻，但真係幾甜，食蠔就無諗住食飽架，都係過下癮，所以我覺得一盆三四個人食都 ok。

烤蠔係有技巧架，佢地會有解說，記得聽清楚，蠔仔洗得幾乾淨，仲有時會見到呢種同蠔共生嘅波子蟹，以前魚街有賣，我都有養過，依家仲有無魚街其實我就真係唔知。

食完蠔就可以上高速公路過北門行下先，呢條路堅呀，暫時係 GPS 上面係無顯示的，不過大概知方向就可以上去，因為快好多，記得落返去就 OK 。

北門成個設計都係為左造 d 景點出黎俾人影婚紗相，有去過台南市區都知最多就係婚紗鋪，依家亦流行自助婚紗，即係自己搵攝影師影，影完會幫你大執二三十張精選，其他蝦碌相都連毛帶屎俾返晒你，唔洗 sale 黎 sale 去咁麻煩，要喼神要相簿油畫一樣有得俾埋你，直接交易快靚正。

北門水晶教堂就係主打賣點啦，不過水晶教堂真身係無開放的，除非你真係黎影婚紗啦，影婚紗呢 d 咁無乜謂嘅活動我梗係唔贊成啦，自己柄埋影返一千幾百萬張咪得囉，又唔洗菲林。

一場黎到都建議大家入旅客服務中心吹吹冷氣，有鮇香鯨睇又盛咁，真係有鯨魚出沒響台南架，啱啱上個月先屎左條響台南⋯⋯

北門除左水晶教堂，仲係 N 年前台灣偶像劇王子變青蛙拍攝場地，我就淨係認得陳喬恩者，咩王子咩青蛙我都唔知。

同一個社區，行多幾步會發現有幾間老房好特別，原來係日治時期一位醫生嘅故居，裡面係介紹返台南居民曾經受烏腳病之苦，王金河醫師同當地教會一直好努力幫助當地居民遠離病魔折磨，係非常值得參觀嘅地方。

王金河醫師被稱為烏腳病之父，默默留守小鄉村內免費幫居民治病，不問回報嘅付出十幾年，直至台南慢慢發展至有自來水，烏腳病才能根除。

診所原址亦開放參觀，膽小者慎入啊，好彩我平時 walking dead 送飯嘅者。

黎到北門鄉，有機會知道屬於呢個地方嘅故事真係不枉此行，希望王金河醫師嘅精神長存於這個地方。我成日都話今日俾你賺盡一百億，一百年之後都係歸塵土，做一件一百年後都有人讚頌嘅事，先係確切令呢個世界有一點點不一樣，希望有能力者繼承此精神，令台灣變得更不一樣。

由於食烤蠔食唔飽嘅關係，行一行之後係咪肚餓呢，下一站同大家去食台南特產虱目魚餐。

蚵仔麵線好正 (雖然已經食左好多)，味道啱啱好，夠味得黎唔會太咸，蠔仔梗係新鮮啦，唔洗再加調味架喇，直接清左佢。

呢個虱目魚一夜干我真心大推，五星級無得輸，一試難忘，我都好 d，高雄過去唔係好遠，你地就自己諗喇，上左癮好頭痕架下，諗清楚先好試。

呢個就係虱目魚西瓜綿湯喇，虱目魚知啦，咁西瓜綿係咩呢？佢並唔係百潔布 d friend，而係種西瓜嘅農夫會響眾西瓜仲係 bb 嘅時候揀 d 發育得唔係咁好嘅瓜仔，唔俾機會佢長大喇，直接摘佢落黎醃左佢用黎煲湯，酸酸甜甜有 d 似酸菜咁，幾開胃又有營養，值得一試。

醫完肚就差唔多可以出發去井仔腳喇，如果就到時間仲可以睇埋日落添。呢度唔洗門票，仲有鹽派，咪鬼再去七股鹽山喇，講起就火滾。

呢度正呀，廟口停車又方便，有時間可以四圍行下等夕陽。

附近仲有阿伯賣虱目魚一夜干添呀，不過我家無飯主婦話無信心攪得掂，所以我無買⋯⋯

喂~ 真係有鹽派架， 自己去羅個袋入包返去啦。

仲有得落鹽田玩添，不過佢有晒牌叫我地落去要除鞋，拜託大家守下規矩啦，互相尊重應該係世界通行嘅。

井仔腳係台灣最古老嘅鹽田，地下係用碎瓦片鋪成，目的係要將鹽同土地分開，咁先曬得出靚鹽咁話。瓦片光滑嘅表面亦方便農民去收集鹽，所以佢咁鋪係有意思的。

台南北面景點一日遊大概係咁玩，所以睇大家想台南住返晚定順住往北面一直玩亦得，台南依家住宿選擇有比較多，亦有好出名嘅兒童主題酒店，想話去浸個溫泉食個甕仔雞先又得，有需要可以同我地講，行程安排同訂房都可以一次過攪掂晒的。

艾笠墾丁 2 - 40人專業台灣包車服務, 免費行程安排, 可指定香港人導遊

HK Tel : 81700438

Email : info@iLoveKenting.com

Web : www.iLoveKenting.com

Facebook : http://www.facebook.com/iLovekentingHK