台中 - 溪頭妖怪村 + 紫南宮求發財金

好多朋友話去台中玩，其實都唔係玩台中，好多大景點都係響南投縣，例如清境、日月潭等等。雖然你就算同人講話去南投都無人知你去邊，但南投縣話晒都叫做台灣第二大嘅縣，所以淨係留中部玩就已經有排玩了。妖怪村係南投縣溪頭大目標大景點，除左工作之外，我哋自己一家幾乎每年至少都要去一次，因為要去紫南宮拜神，咁就順便一次過介紹埋俾大家睇睇。

雖然話南投係台中隔離，但唔好睇小咗台灣，同香港比南投大概有四個香港咁大到啦。假設從台中火車站出發，到妖怪村大概 1.5Hrs 車程左右，紫南宮順路，但係響高速公路口嘅另一邊。

落左高速公路之後沿指示一直往山上面走，見到兩邊都停晒車就知到喇，都係一樣車位難求，要好似我咁停正門口真係要去買張樂透。山邊停車睇住跌落渠，上落車亦要非常小心。落山記得用低速檔。

行程按排就要睇大家時間點就喇，妖怪村其實係明山森林會館酒店其中一部份，所以可以安排時間住一晚啊，房價同一般酒店差唔多，HK$2000/night 左右。

妖怪村係免費對外開放的，所以唔洗擔心，唔係房客都可以四圍行下影下相，暑假酒店會攪『魔神祭』，夜晚有活動好熱鬧的。

妖怪村範圍唔算好大，但係幾多野行，小朋友又玩得開心，山上天氣一般比較涼啊，帶小朋友的話要預先準備。

裡面賣 d 野都幾得意架，唔買都可以玩餐死。

以前黑色包裝勁好食嘅妖怪麵已成絕版，依家只有噴射麵，最後無買唔知好唔好食，留返俾你地試下。

每日仲有新鮮出爐麵包食添，撞啱時間亦值得一試，村內仲有幾間餐廳，不過都係一般般，為醫肚而食 OK。

呢張打卡相係必影位，間鋪仔都有好多新奇野睇架。

例如紫色嘅椰菜花咁。

當然仲有好多唔等洗野賣啦，平平地買返去塞住同事把口都唔錯㗎。

繼續向森林方向行可以到林森會館嘅小木屋住宿區，環境唔錯架。

不過夜晚應該會有 d 面青。妖怪村再上去就係好出名嘅忘憂森林，要繼續楂車上去的，車亦不能直達，要駁腳行一段路，建議預先睇清楚天氣情況再上去，因為天色一暗準備不足就頭痕喇。

跟住原路落返山，過去紫南宮拜神，唔係誇張，真係幾乎全台灣做生意嘅人都會黎拜，所以無論幾時黎都香火鼎盛，仲有得求發財金添，現兜兜新台幣俾你㗎。

黎台灣玩不妨留意下，好多商鋪都會放呢隻金雞㗎，想帶返去唔係俾錢就得，要去問聖杯睇下有無計先俾帶走，有唔明就問廟祝公啦。

借發財金類似我地同觀音借庫咁，不過就無億億聲咁借，通常係你講個銀碼出黎要借幾多，舉個例要借 NT$600，咁佢真係俾 NT$600 你帶走，下年黎還就一定要還多於 NT$600，條數係咁計之餘仲唔怕你走數添，黎借得嘅就信，信得嘅就唔敢唔還㗎喇，穩賺。咁大家又排隊摸隻雞做咩呢？都係 d 意頭野啦，認真 d 仲有口訣要唸添架，佢旁邊有說明。

仲有好多花臣野，都離唔開金色同雞，台灣係個好傳統嘅地方，初一十五 5星級酒店都照樣響大門口開檀拜神的，入鄉隨俗，信唔信都好都要尊重下人地文化，好奇可以禮貌地問，台灣人亦好樂意答你。台灣 d 廟應該同七仔差唔多多，五步一小廟十步一大廟，各有唔同功用，中部地區最有名就係紫南宮，想了解一下台灣文化就值得去睇下，做廟做到個停車場大過大球場，仲起個六星級公廁俾大家用，有時間真係要去拜訪下㗎。

艾笠墾丁 2 - 40人專業台灣包車服務, 免費行程安排, 可指定香港人導遊

HK Tel : 81700438

Email : info@iLoveKenting.com

Web : www.iLoveKenting.com

Facebook : http://www.facebook.com/iLovekentingHK