冬天攻略 - 臺灣黑熊過冬篇

臺灣黑熊係亞洲黑熊亞種，心口有個白色 V 字，非常好認。眾所周知熊嘅習性，過冬前會喪食積存脂肪，準備嚴寒冬季要扎炮，所以以下落黎要講嘅，係全部同臺灣黑熊無關嘅行程，但建議大家同黑熊一樣喪食黎過冬，不喜勿插，些些。

臺灣出產水果好多，要食就要分時令，冬天梗係去採草莓啦，苗粟大湖草莓係最出名，全世界草莓品種有 600幾種，臺灣種嘅係用日本引進嘅豐香草莓改良而成，又甜又多汁，肉地實淨 d，今年收到風原來高雄都有喇，我地三寶妹最鍾意草莓，梗係要去反下啦。

由於上個禮拜都落雨轉涼，所以快地濕滯 d，終點前 200米仲有積水添，不過一場黎到，你睇我個女開心到，話唔玩點收到科，所以媽咪極度唔願意下著水鞋落場。

呢個草莓農場真係唔錯，有齊架生，小朋友用嘅細鉸剪都有，小朋友水鞋又有，草莓都好靚好新鮮，無話爛容容咁，地方又夠大，唔洗人逼人真係無得頂，咁當然天氣好先去就更完美啦。

小朋友自己落手落腳採集真係好開心架，免入場費，採幾多磅重計錢，呢度消費 NT$260，比生果檔買貴少少，喂大佬咁人地都要搵食架麻，梗要賺你多少，開心無價，自己剪完草莓仲有草莓雪糕食添。

特別一提大家，黎呢一類型體驗農場玩，請把握機會教育小朋友尊重農夫血汗成果，盡量唔好破壞農作物，輕手 d 睇真 d 先好剪，萬一剪中爛野都請認命，因為係自己揀嘅，無得怨人，同揀男友一樣阿女（揀錯都剪左佢先)。

剪完草莓跟住去左可可園食朱古力，聽講新鮮可可有抗氧化功用，最近覺得自己氧化得好緊要，所以專登黎試下。除左抗氧化，朱古力其實有輕微亢奮作用，傳聞仲話會令人有戀愛嘅感覺添，所以情人節要送朱古力囉。

屏東最近又係一窩蜂種可可，好幾個地方都有類似野玩，除左可以坐低 tea 之外，仲有 DIY 行程可以玩，不過就梗係要先預約啦。

其實我比較鍾意 70%以上純朱古力，不過櫃檯個阿姐猛 sell，咁又即管試下佢地嘅生巧克力，唔太甜還可以，不過我都係鍾意 70% 多 d。

坐低飲杯熱可可，好濃好香，一壺份量夠兩三個人飲，仲有試佢個巧克力布甸，合格唔差但無驚喜。當日因為又開始落雨喇，所以無參加 DIY 行程，有參觀過佢地環境，硬件設施唔錯，但軟件配套仲有進步空間，可能阿姐 sell 唔中我想要嘅野，我自己條氣頂住啦，哈。高雄去墾丁行山線順路會經過，買 d 朱古力返去食都 ok 嘅。

跟住就唔得了喇，冬天就梗係要打邊爐啦，呢間新園牛肉爐專食手切本地牛，好食到喊呀，真心誠意推薦。

睇落好似好簡單，食過你就知佢猛料，我老婆唔太食肉，但次次都主動追加，每塊牛肉都係手切架，切嘅方法都好特別，留心睇其實佢係一塊厚切再中間補一刀但唔切斷佢，每塊都切得好平均勁過庖丁解牛呀，煮嘅時候應該唔洗講啦，唔見紅就食得架喇。我自己好鍾意食羊，所以叫咗碟羊肉，唔係唔好食，但真係牛肉好食 d，要食羊返高雄有羊肉爐仲正。

個湯底無得揀，好似清湯咁但係好夠味的，味道岩岩好唔會蓋過牛肉嘅鮮味，睇返都覺肚餓，真係唔講得笑。

價錢響臺灣消費唔算平，但真係一試難忘，值得襟定錢黎，當然如果用香港嘅消費黎比較，直程係超值啦，營業時間有中場休息，落機睇住時間喇。

真係手切唔係講笑架，所以佢中場唔休息唔掂呀，切幾耐先夠一碟呀，唔夠五分鐘我就清咗啦。

仲有其他火鍋料都唔馬虎架，響雪櫃自己攞，呢盆野就係臺灣人好鍾意食嘅米血糕喇，我接受唔到，你地可以試下。

佢個砂鍋魚頭都好似好堅，不過佢落場喇，我食唔切，阻人收工係死罪，所以我閃先，下次再黎試。

只要心中有熊，由朝食到晚係無問題的，我又計劃緊下禮拜去浸泥溫泉食溪蝦同土雞，又想食薑母鴨同燒酒雞，要好好把握呢一次寒流，製造多 d 脂肪，咁就可以完成我嘅心願，揸電單車衝上武嶺睇雪喇。BTW 如果大家真係想睇臺灣黑熊，奇美博物館有隻標本，高雄壽山動物園有隻仲在生嘅響度，大家喪食完之後去同黑熊合照，當堂覺得自己又有 qouta 再食過，所以大家放膽食啦。下禮拜我再同你講溫泉區有咩好野食，嘿嘿嘿。

艾笠墾丁 2 - 40人專業台灣包車服務, 免費行程安排, 可指定香港人導遊