高雄 - 食神煮嘅家常菜 川味蜀府

位於左營極唔顯眼位置~ 旅客絕對唔會黎嘅地方~ 有間好細間嘅家常菜餐廳~ 我已經黎食過好幾次~ 所以唔可以唔介紹下~ 特別係夏天嘅時侯~ 好多時都會諗起呢個地方~  原來食神一直都在民間~

川味蜀府
地址 : 高市左營明誠一路 437 號
電話 : 07-3965355

雖然只係一間小小餐廳~ 但主廚大有來頭~ 去過北京打擂台先返黎台灣開餐廳的~ 

有晒金腰帶又盛咁~ 唔知係咪出自中華廚藝訓練學院呢?!

有懶人包套餐~ 唔洗諗~ 不過無我想食嘅菜~ 所以我次次黎都係單點~

單點價錢亦好親民~ 有圈圈係招牌菜~ 咁我食開 d 咩呢~ 即刻上菜啦咁~ 

椒汁白肉 必點~ 唔係講笑~ 我真係噏唔出有咩可以同佢比~ 白肉當然係豬肉啦~ fit 晒~ 我阿媽唔食牛的~ 佢用五花豬肉切成薄片~ 一 d 都唔會覺得豬肉肥~ 同埋唔好睇佢咁多辣椒響面~ 其實唔辣的~ 但帶一點點麻~ 食完嗰兩條潤腸真係會有少少麻麻地的~ 有睇開我去搵食嘅都知我唔食得辣~ 我話得唔辣就真係唔辣架喇~ 放心~ 作為第一度菜真係非常開胃~ 仲有我平時都唔太食白飯的~ 但係每次黎一上呢味菜~ 我可以清左碗飯~ 仲要克制自己留返半碗食其他餸~ 所以我話夏天特別想黎食~ 因為高雄同墾丁都好熱~ 有時熱左成日真係無咩胃口~ 當諗唔到食咩嘅時侯就會柞車黎食~

再黎必點推介 乾煸四季豆~ 叫做搭個蔬菜~ 用豬肉碎炒香~ 又係送飯一流~ 咁你話點會食唔落飯呢?!

椒鹽排骨 我敢講最簡單嘅菜先最考功夫~ 一般食到嘅~ 唔係太咸就係太乾~ 炸到黑晒先上菜~ 金腰帶大廚表現到咩叫做啱啱好~ 口味適中~ 火喉啱啱好金黃色~ 裡面 d 肉仲好 juicy~ 又唔會唔熟~ 總之就掂啦~ 

仲有呢味黃金豆腐都係必點~ 完全睇唔出~ 但係食落就知~ 外層佈滿咸蛋黃~ 同個豆腐真係絕配~ 食得出無兩下散手係做唔到嘅野黎~

銀絲卷我一般當甜品食~ 皮脆肉嫩~ 你睇佢金黃色外皮其實好薄~ 食銀絲卷最怕索飽油~ 呢度食就梗係水準之上啦~ 提大家如果想一樣當甜品食的話~ 就最尾先落單~ 佢好快就可以上~ 同埋可以睇埋自己飽唔飽先~ 我自己就飽唔飽都食啪埋先走~ 哈~ 

爭 d 唔記得講~ 佢個烏梅汁都好正~ 又係自己造的~ 唔會有化學野嗰種酸~ 唔洗問架喇~ PO 得出黎嘅都係必點~ 你見我無吹水真係唔記得~ 一黎到就飲左半支先餵相機....

總括黎計~ 勁過大酒樓~ 但價錢超親民~ 講完~ 個女唔計~ 一家四口食到飽~ 埋單 NT$1060~ 真心推薦大家試下~ 特別係好似我咁帶埋兩老出遊~ 唔通食麻辣鍋~ 仲掃街食大雞排咩~ 呢間野係高雄玩左咁耐~ 又一穩陣牌之選~ 大家不妨去試下~ 

艾笠墾丁 2 - 40人專業台灣包車服務, 免費行程安排, 可指定香港人導遊

HK Tel : 81700438

Email : info@iLoveKenting.com

Web : www.iLoveKenting.com

Facebook : http://www.facebook.com/iLovekentingHK