台南 - 都會公園奇美博物館

呢個景點我真係期待咗好耐，每次從高速公路經過，好多人都會問呢度係咩黎。踏入 2015 年，奇美博物館終於響台南都會公園啟用喇，我無執輸搶第一批入場睇下，雖然館內唔俾影相，但係外面行下都已經夠理由帶相機去，最好帶埋腳架。目前都係採取預約制，想參觀博物館嘅朋友記得上網預約。

台南都會公園 (奇美博物館)
地址 : 台南市仁德區文華路二段66號
網站 : 奇美博物館展覽內容網上預約
門票 : NT$200 (有導覽機租金 NT$100 按金 NT$500)

從高雄出發約 45mins 車程，都會公園全區佔 66 公頃，奇美博物館就係響都會公園裡面，由奇美實業耗資 15 億台幣興建，再捐贈俾台南市政府。咁奇美實業咩料咁巴閉呢，奇美瓣數其實好多，其中奇美電子係全世界第四大液晶面板廠，創辦人許文龍先生亦多才多藝，館中都係佢多年收集返黎嘅珍藏，其實小弟孤陋寡聞對許文龍先生跟本唔認識，不過參觀完奇美博物館之後真係大開眼界，好有興趣想多了解一下許先生。許文龍先生認為，「一個國家強盛與否，取決於人民的文化素質和涵養，想提升國家在國際舞台的競爭力，應從文化藝術著手; 留給後代子孫的不是金錢，而是永續的自然生態及藝術人文資產」，身體力行實現理念，實在敬佩到佢非常。

整個都會公園都以希臘式建築構成，就算無預約，淨係睇外面已經好有 feel，公園中間係一個人工湖，橋兩邊都係希臘神話中神像雕塑。

無錯，我就係未見過靚仔。

博物館本身就係一件藝術品，好難想像佢係一間私人博物館。

原來鴨係可以一次生咁多蛋。

證明唔止我一個人期待，平日黎都 full booking，整個一二月份都 full 晒，大家三月黎玩要快搶，台南首推必玩景點。館內展覽嘅野係你想像唔到咁多，我地搶到第一輪免費入場，之後收費 NT$200，入去淨係睇自然館 d 動物標本已經值回票價，裡面有二千幾件標本係從美國一間執左笠嘅博物館嗰度，一炮過買起佢再運返黎的，我問過裡面職員，佢話除非寫明係 "複製品"，如果唔係全部都係堅野，你留心 d 睇下就知，真係九成九都係堅野黎，絕對值得睇。另外兵器館亦嘆為觀止，展覽品都附有說明，順便對世界歷史補習一下。

許文龍先生本身好鍾意玩小提琴，千秋王子呀大佬，所以博物館內亦收藏好多樂器，大型到教堂裡面嗰 d 管風琴都有，唔睇真係走寶。奇美博物館另一賣點就係西洋藝術品，好多名畫、雕塑等大把有得睇，不過小弟淨係睇龍虎門同火影忍者，呢部份已經超出我認知範圍了，不過老闆 d 展品多到呢，係廁所門口都要擺滿架，銀器、鐘錶等都唔講得笑，總之一定要去睇係啦。

大家 book 左時間，可以早少少到，一黎可以影下相先，同埋裡面有紀念品賣，有特別郵票亦設有郵局，咁你知玩乜啦，仲有 cafe 可以飲杯野先入場添。

跟足有許願池，快 d 許返個願，希望我都可以有錢到攪間博物館，送俾市政府俾大家睇，耶。

燈光襯托下真係好有 feel，真係響門口影相都抵黎。

所以真係唔少人等天黑先黎架。

絕對係器材展無誤。

所以影還影，就唔好話太投入，雖然真係好 lum 下。

識影一定係影公園入口噴水池位，仲要等佢唔噴水先影，噴水嗰時真係無咁靚，死未。咁當然係兵家必爭之地啦，各施各法自己執生喇。

館內禁止攝影，所以我驚影衰香港人唔敢攞相機出黎。導覽機個人認為可有可無，第一梗係無廣東話聽啦，只有國語、英語同日語，租機前要揀定，無得中途轉機。第二我自己對藝術品興趣不大，導覽解說亦主要係藝術品，動物標本同武器都較少有導覽解說的。如果你係假日去的話 (放心，假期去都 ok，因為有限入場人數的。)，有另一種解說方式選擇，都係要先租解說機的，只限假日分時段有志工現場解說，用解說機調頻收聽的。可能依家都係岩岩開，有部份官網資料，到現場可能會有小變動，都係去到現場問為準。最後提提大家，唔好踢拖行博物館啦，場內真係禁止攝影同飲食，亦唔好 V哇鬼叫，費事俾人以為你係陸客啦。

呢個景點我真係期待左好耐，行完絕對無失望，直程喜出望外添，非常值得去行下，可能你同我一樣唔明究竟許老闆點賺咁多錢，咁有計攪咁多野返黎，不妨問下裡面職員，佢地有可能知點解，但又未必會話你知。淨係起呢壇野用左 15 億台仔，我好肯定裡面 d 野絕對唔止 15 億，有興趣記得預約，二樓有特別位飲咖啡，同埋有兒童區未開放，留返俾大家三月後黎慢慢玩。

艾笠墾丁 2 - 40人專業台灣包車服務, 免費行程安排, 可指定香港人導遊