屏東 - 屏東一日遊行程 - 艾笠私伙遊記

大家黎墾丁玩左咁耐，唔知你地又知唔知其實墾丁只係屏東縣裡面一個小小嘅地方呢? 屏東係台灣第五大縣，咁大地方邊可能無野啱玩呀，大家從高雄出發要穿過整個屏東縣先可以到達最南嘅墾丁，中間會唔會錯過好多值得遊覽嘅地方呢? 不如我帶你地去睇睇屏東有無野啱大家玩啦。

其實大家都係飛高雄啦，之前帶大家去東港其實都係屏東黎架，不過屬於靠海地區嘅海線，今次同大家玩山線，不過屏東都真係好大，今次先同大家推薦一個可以玩完屏東先到墾丁嘅行程。如果大家太早到高雄又或者唔想行海線去東港食海鮮的話，真係值得玩下山線，一樣有好野食的。

高雄出發 > 心之和 Cheese Cake > 泗林步道 > 正宗萬鑾豬腳 > 紫心樓 (天空之橋) > 吾拉魯滋部落 (咖啡) > 萬金聖母殿 > 墾丁住宿

講就無用嘅，一齊睇下個路線啱唔啱玩啦。

第一站心之和 Cheese Cake，又係冠軍黎丫，從高雄機場出發到呢度約 45mins，逢星期一休息。

一睇個牌就知好麥兜。

老闆識做生意，1:00pm 後先有單件餅賣，即係 1:00pm 前到至少要買一個，雖然唔係好大，不過 cheese cake 喎，真係食唔晒。

墾丁都係屬於屏東縣，所以天氣都差唔多，熱起上黎整杯雪糕都唔錯架。

外面有位坐，幾舒適，野生 cheese cake 梗係要即開即食架啦。

好明顯我地係比較強，費事同佢講，直接買一個。

雖然唔係好大個，不過最後都係要帶返屋企。

芝士味夠濃，軟硬度亦適中，cheese cake 黎講無挑剔，唯一美中不足係無野飲囉，乾哽有 d 困難。

有圖有真相，原來真係攞美國乳酪創意烘培冠軍，唔係散打王金腰帶。

雖然去玩就唔好提個肥字，不過食完 cheese cake 咁大鑊嘅野，都要做 d 野嘅，呢條路好靚，值得黎睇下。

其實條路係有車行架，影相唔好太投入，最好有朋友幫你睇車，安全第一啦。

成公里長嘅天然隧道，真係好靚，花時間黎感受下嗰種寧靜悠閒嘅感覺，絕對值得。

各位龍兄或者要影婚紗相，值得黎睇下，我自己覺得值 100分。

大家有做功課都知黎南部要食萬巒豬腳，萬巒並唔係踢波嗰個紅魔，係屏東一個地名，萬巒呢度嘅人都係靠腳搵食，豬腳街你又見過無? 同波鞋街類似，表面上好似好多你揀，其實底蘊裡都是同一條內褲的，咁要食邊間呢?

FOLLOW~ ME~

識食梗係食海鴻啦，不過又唔係間間都係堅，反正我唔會點你架喇，坐啦。海鴻有咩咁利害呢?! 其實據稱海鴻亦唔係第一家做腳的，只係總統蔣經國先生黎過，所以，食啦。

一隻現劈段斤秤，一隻大概 NT$450-NT$590，我食左幾年，呢樣野我知價，哈。

亦有例牌，不過個人認為一隻比較抵玩，反正可以帶走，留黎宵夜啤啤佢無得頂架喎。亦有其他台灣菜，溫馨提示唔洗叫飯，整兩個蔬菜食下就好，一般都食唔晒，同埋去玩唔好一下食到 full 晒，去到邊食到邊先係皇道。

雖然話食萬巒豬腳個醬係重點，但係唔洗成碗下麻，有原因的，半自助式，小紙碟自己分，唔好問阿姐喇，一般出名到咁嘅鋪頭，都係九記服務的。

一般天書介紹嘅都係靠近墾丁海生館嗰間熊家萬巒豬腳，因為屏東真係極少外國旅客黎玩，不過我自稱南部小王子，梗係同大家玩得有深度 d 架啦，要食就食最好食嘅，要玩梗係玩最好玩架啦。

講返隻主腳，口味同熊家有咩分別呢，海鴻呢隻明顯地肉質較嫩，入口鬆化，但係相對肉無熊家咁濃味，即係無咁入味啦。表皮兩間不相百仲，一樣 Q (台灣潮語教室 : Q = 彈牙，啱啱識嘅台妹唔好諗住讚人 cute 呀，因住俾人衾呀)。醬料亦無熊家咁重蒜味，總括黎講我自己比較鍾意食海鴻，肉質我比較 like，熊家可能食得太多，總覺得口味太重，同檯亦鬥搶皮食，通常都淨返 d 肉，因為熊家要做到比較入味，相對口感比較柴皮，海鴻連肉都食埋，雖說無咁重味，但係有個醬其實剛剛好的呢。

手痕點左個客家豬肉食，意外驚喜，得。不過同豬腳撞到應一應，人多先可以叫嘅 option。

龍鬚菜亦值得試，算係台灣野菜一種，唔係成日有得食的，南部水蓮菜亦唔錯，海邊有雨來菇(亦有個好詩意嘅名叫 : 情人的眼淚) 亦要一試。相中一粒粒嗰 d 叫樹子，台灣南部好常用黎煮野食，微酸幾開胃架，蒸魚炒菜最常用到，只食皮有核的，黎台灣就試下台式煮法啦。

食飽指定動作，阿姐麻煩你打包攞走，些些。

食飽散步行下豬腳街，萬巒旅遊區都係以豬腳街為中心，都算係國腳級架。

只要你準備好旅遊心情，一定會搵到值得旅遊嘅理由，絲瓜布呢度買就啱架喇，返市區都有，唔係呢個價錢者，尋寶都要睇你識唔識貨呢。

又話玩山線，咁梗係會上山啦，路況還可以，不過安全車速下，上山約 40-50mins。

行咁遠為左乜，就係為左黎紫心樓嘅呢條橋，叫做天空之橋，一覽整個屏東風景，天氣好仲見到高雄 85 大樓添。

一入門口就會發現，老闆係個對稱建築迷，環境亦好用心整理，水池角落，停車場規劃到地上碎石，睇得出有用心整理，所以到門口我已經滿心期待了。

老闆娘熱情地引領我地參觀，真係太有心，一入去見到唔係講笑的，上到山先知原來咁多人。

環境舒適，好重要所以講三次，整理得好乾淨好用心，我老蓮咁遠走上山，梗係同你講 feel 啦，感覺真係好重要，值得推薦。

天空之橋，are you ready~

依，比想像中穩陣好多喎，哈。我仲跳左幾野，safe。 (當然係即時俾人丙啦，哈)

無敵靚景，可惜天公不造美，俾我一個再黎玩嘅理由，i'll be back~

好明顯我係俾佢丙架啦，你睇佢幾面青，哈。

對稱建築迷無誤，久仰久仰。

之後老闆娘帶我地到 VIP 區開開眼界，因為佢地有住宿區的，部份地方亦只開放俾房客使用，所以先焗我撻朵，當然門口條友都係話 "識你係老鼠" 啦，好在老闆娘話我又靚仔又盛咁先俾我黎睇兩眼咋。

老闆話呢個池 d 水係山泉水引過黎架，仲可以加溫泡湯，後面係吧檯，地板下有暖氣。我第一句話 "頂~ 咁你點賺錢?!"，喂~ 啱呀，南部好多人做野唔係為左賺錢架麻，老闆話本身諗住攪個私竇自己玩架咋，依家叫做收夠人工請人打掃就 ok，你又吹咩?! 偶像到響山頂啦，老細~ 俾你咁攪一攪，我真係覺得自己好窮呀。

住宿 + 泡湯 + 嘆返杯酒，有無打工換宿呀老細，我宿返一頭半個月得嗎?

講講下老闆就攞出黎喇，我都未開口就倒左杯 full 嘅俾我，老闆你真係好有 taste，跟你買酒無衰。

我老婆只係話唔敢飲 whisky，又係諗都唔諗就倒杯 rose 俾佢，好在我地仲有 Joey 姐姐柞車。

飲到咁上下老闆叫我地行出去擺個 pose，唔好睇小呢張相，老闆先打電話落 order 叫人停左個水池濾水先，再指導我地擺 po。

有客見到即時叫老闆 encore，無托手㬹，訓身演出架喂。

堅持影到到位先起身，我未見過咁過癮嘅老闆，真係不枉此行，我覺得呢個地方真係值得住返晚，等老闆帶你睇多 d 佢嘅玩具，地下有個酒庫，我唔敢跟佢去，因為佢話無房喇，我唔想碌返落山。

臨走時特登搵部落頭目影相，即係原住民嘅大佬呀喂，即係去銅鑼灣見到鄭伊健，點可以唔影呀。

其實大佬原本已經換左衫架喇，老闆聽到我地想合照，又請大佬換返套裝出黎，真係唔好意思。

行程仲未完架，落山順路去埋吾拉魯滋原住民部落，可以多了解原住民，我自己十分推薦嘅行程。嚴格黎講大部份台灣人都唔係台灣人黎架，原住民先係呢個地方嘅主人，無奈唔夠人多，所以先攪到好似少數民族咁，只佔台灣人口 2.3%，目前政府認可有 16 個族，分佈台灣各地，各有自己語言同文化特色，我自己對呢方面好有興趣，亦係台灣特色之一。

吾拉魯滋係排灣族嘅部落，傳說中太陽於大武山頂產下兩隻蛋，並指派百步蛇守護呢兩隻蛋，兩隻蛋孵出一男一女，就係排灣族嘅貴族，所以排灣族又稱為太陽之子。傳統圖騰中百步蛇成日都會見到，亦係排灣族貴族專屬紋飾，頭目頭冠亦係用百步蛇裝飾的。

原住民俾我印象就係一班樂天之命嘅人，無可否認佢地係非常有生存智慧，懂得愛護自己環境生態，比我地平地人有智慧得太多。

大部份原住民都係信天主教的，當然係同歷史有關，早期傳教士到台灣後的確同原住民一齊渡過好多難關，所以通常部落都會有教會。

吾拉魯滋部落係因為八八水災後整村移遷至平地嘅原住民部落，由紅十字會同台灣政府合建永久屋 118 戶，安置泰武村民。

唔係好話，直頭唔好聽，豪宅黎架喂，社區規劃得非常舒適。

連活動中心都有，一 d 都唔馬虎架。

部落中走走，到處都有原住民特色，不過如果要影人前，最好禮貌地詢問下人地意願先啦，原住民其實非常熱情好客，但一切都基於互相尊重原則下，相信去到邊都係一樣。

有心睇下，會發現好多有趣故事，有斷片嘅決心，可以同原住民朋友飲小米酒，你會得到更多的。

泰武咖啡響台灣有名有姓的，黎到一定要試下，順便支持下原住民部落產業，一舉兩得。部落亦有攪 DIY 體驗，大半日行程帶你去採咖啡豆開始慢慢玩，今次梗係無時間玩啦，有興趣嘅紫心樓住一晚，深度旅遊就有行程啦麻。

台灣咖啡做得有聲有色，地理優勢，中央山脈第一高峰玉山有海拔 3,952 米，黎到不妨試下啱唔啱口味。

有唔明呀，問 Joey 啦，小米酒搵佢頂都得架，不過就無人柞車喇下。

排灣族有三寶，琉璃珠、陶壺同埋青銅刀，猛野黎，不過好似帶唔到過關。

仲有好多有原住民特色嘅野賣，唔洗買黎買去都係木頭名信片。

小東西做手信特別得黎又有意義。

不過原住民本身唔適合做生意，有心就唔好俾壓力佢，問佢價錢後可以等佢慢慢查下先，放心佢地唔識禁水魚，價錢只有報平唔識報貴，咁大家就唔好講價喇，唔買佢壓力反而無咁大。

最簡單咖啡相關野選擇亦好多。

last 一站去睇萬金聖母院，係台灣第二老教堂，僅次於高雄玫瑰教堂，不過因為玫瑰教堂整修過後太新淨，即時太過 SKII，所以我覺得萬金比較有 feel。

平安夜有光雕 show，太逼人睇唔到 d 咩，平日舒服好多，裡面亦保留有傳統教堂面貌，值得黎參觀嘅景點。

KA432 10:30am 落機，到屏東玩半日，大概 7:00pm 到墾丁，民宿 check in 休息下，再行墾丁大街夜市食晚餐，咁你話咁嘅行程 fit 唔 fit。呢個行程適合打算黎墾丁玩四五日嘅你，因為三日兩夜已經 ko 晒墾丁大部份景點，頭尾兩日多個選擇玩埋屏東，又或者你已經黎墾丁玩過兩三次，唔想再行船帆石風吹沙，但又想黎渡假的你，香港人最緊要有得揀，俾多個選擇大家，日期人數 whatapp 俾我，我幫你攪亦得，得左。

艾笠墾丁 2 - 40人專業台灣包車服務, 免費行程安排, 可指定香港人導遊