高雄 - Kafe Time 啡拾光

話說每日返公司都會路過高師大 (國立高雄師範大學) 舊宿舍，呢棟建築已經有 50年歷史，前陣子見佢動工，看著舊房子活出新色彩，一直期待佢嘅新面貌終於開業了，咁我梗係要去八下啦。

Kafe Time 啡拾光
地址 : 高雄市苓雅區四維二路88號
電話 : 07-7517700
營業時間 : 10:00-21:00
Facebook : https://www.facebook.com/KafeTime

雖然捷運去唔到，不過值得去嘅，你睇佢外觀咁顯眼，為沉悶嘅城市帶黎朝氣。 一 d 都睇唔出有 50年歷史，一樓室內室外都有位坐，飲杯咖啡叉叉電，跟住去對面食會上癮嘅拉麵，邊間拉麵就下次先話你知。

Kafe Time 暫時都屬於試營階段， 29/12 有開幕式暫停營業，八過下原來係統茂集團同高師大合作開的，坦白講我自己好鍾意老屋翻新嘅感覺，所以佢一開就去捧場了。

門口嘅紅磚牆雖然太新淨，不過都算係開正我嗰瓣。

入去第一個感覺係，原來呢隻藍可以同磚牆咁河蟹，搭木頭亦好啱 feel，加棵聖誕樹真係非常 warm。

開得 cafe 好例牌地要有返 d 架生做擺設。

其他地方都好有心思，仲有我愛嘅偉士牌添。

估唔到仲有野賣，可能係統茂有關，識得賣 d 有代表到台灣嘅野，果然係食開旅遊業飯大的。

呢個瓜沖涼正呀，咁識玩嘅就梗係唔會響呢度買啦，因為呢碌野四圍都有得賣的，所以俾人放到天花板咁高嘅神檯位供奉緊。

可以八卦下，單價對於我呢 d 蔗民黎講有點兒貴。感覺同林百貨類似，雖然略貴，不過唔係求其亂賣，有揀過先放上架，有 d 野外面又真係好難搵，若然遇到心頭好，亦值得落手的。

座位算多，室外仲有小花園可以坐，因為我係朝早黎，所以可以任影。

出黎玩就唔好去 Starbucks 喇，去拜訪下唔同地方嘅小 cafe，俾自己多 d 不一樣的旅遊回憶，你又黎睇下呢間啱唔啱 feel。

可惜台灣無聖誕假，呢度佈置得咁有聖誕 feel，好適合平安夜黎把妹呢。

呢度除左係 cafe，二樓仲係展覽室，定期有展覽睇，一次過滿足晒你三個願望。

上到去見到無人，偷偷地影張大環境俾大家睇下就算，好多展覽都唔俾影相，係我唔啱，我對你唔住。

言歸正傳，Menu 選擇唔多就啱晒我，唔洗諗梗係老虎蟹都叫雙截棍啦，雖然 cafe 有中國茶飲唔係咩新奇事，動機亦好明顯想打外國旅客市場，需知道台灣高山茶的確係繩，有興趣可以試下。咖啡除左有一般美式義式，單品咖啡亦有選擇。

老婆例牌香草拿鐵，latte 本身就奶多過咖啡，啱女仔口味，佢地嘅拿鐵咖啡味唔會淡到無，比例啱啱好。

我自己飲單品曼特寧，咖啡味幾香，不過意外地略酸，我都係鍾意重口味多 d。

有樣野要注意，原來叫咖啡呢，係送 cheese cake 架，幾好食架喎，oreo 餅底無得頂的。

呢個就係雙截棍喇，我有問佢究竟雙咩截咩棍呢?! 佢話塊野一邊係朱古力醬，一邊係花生醬，所以就係雙截棍喎，原來係咁......

雙截棍又送個湯，結果成檯都係野，有 d 老尷，兩條友好似好餓咁。

好在所有野都好食，我成功將佢地清晒，高雄曾經係香蕉王國黎架，相信用香蕉黎造雙截棍都係有意思的。

外面小花園氣氛都好好，high 個 tea 黎渡過一個悠閒下午，跟住去排隊食拉麵，仲邊有得頂啫。

總括黎講，點咖啡有 cake 送，平均每人消費 NT$150-250 就已經夠玩，有返三兩個朋友一齊可以整多份雙截棍，一個地方有得 hea，有野飲有野食仲有展覽睇，加上本身棟建築物就有返 d 歷史，不失為個值得去的景點。

艾笠墾丁 2 - 40人專業台灣包車服務, 免費行程安排, 可指定香港人導遊

HK Tel : 81700438

Email : info@iLoveKenting.com

Web : www.iLoveKenting.com

Facebook : http://www.facebook.com/iLovekentingHK