高雄 - 季節限定親子掘蘿蔔體驗

黎到台灣生活後，發現蔬果都係食時令當造嘅，大部份蔬果都係台灣自己種，平靚正，所以識多個朋友，去到邊都有著數。尋日專登去旗山搵朋友，食完飯就去玩掘蘿蔔，美濃地區依家開始到農歷年前都有得玩，蕃茄亦都係時侯喇，所以睇下想食咩就去掘咩啦，重點係小朋友可以體驗下，真係玩得好開心。

高雄有個地方叫美濃，美濃嘅客家文化村同埋文物館都係好啱小朋友去嘅地方，農歷年期間仲有花海添。依家開始到過年前都有蘿蔔可以自己掘，美濃嘅蘿蔔好特別，叫 "白玉蘿蔔" 好細支的。蘿蔔唔啱玩咩，仲有得玩摘茄，美濃嘅小蕃茄都係特別品種，叫 "橙蜜香蕃茄" 細細粒好似車厘茄咁款，好好食㗎。

其實美濃一直以黎都係靠農業為生，不過以前呢度 d 農民呢，係撈偏種煙嘅，最風光嘅時侯，種煙好搵過種米十倍，但係自從 2002年政府菸酒公賣局唔玩之後，美濃嘅農民就慘喇，全台灣四分之一菸葉產自美濃，可想而知對當地農民有幾大打擊。不過美濃大部份都係客家人，佢地同其他農村唔同，雖然同樣面對人口外流，財政緊張等不利因素，但係美濃呢個無工業嘅城市就成功將農業轉型，攪呢 d 體驗農場，吸引觀光人流，2014年存款突破 60億，五年來逆線增長 43%，真係全台農村中嘅佼佼者。

入返直路，講返支蘿蔔，你睇真係短小精悍㗎。

無限人頭，入去任玩，對大人小朋友都係一個好好玩嘅體驗。

你睇個大人幾開心。

小朋友就梗係開心啦，其實我自己幾廿歲都係第一次掘蘿蔔咋。

睇見佢地玩得開心，自己都好有滿足感，可能始終都係城市人，親親大自然係人嘅天性。

阿嫲教識三寶自己掘之後，佢就開始開 turbo 了...

不停咁講 "還要~ 還要~"，不過佢幾有眼光，掘親都有返咁上下大支，贏晒媽咪。

三寶天不怕地不怕嘅性格，去到邊都咁好玩，返去阿嫲仲話要整蘿蔔糕食添。

賽後報告，貢大包蘿蔔一掘就十斤，有八斤都係三寶掘㗎，咁你又估下幾錢?! 老闆磅完就計十斤好無? NT$100! 我話 "下?! NT$100?!"，我見佢怯咗一怯放多三碌落去話咁就啱啱好，我真係有 d 唔好意思，因為成村人入去反，攪左咁耐消費 NT$100....

老闆仲好熱情咁請我地食醃蘿蔔，幾好食，又係 NT$100，無囉唆喇買兩罐走。

最後不得不提，同行有台灣旅客都係帶小朋友去玩，掘完一輪企響田邊唔知攪乜，我臨走時發現佢地原來企埋一邊揀，細支嗰 d 就咁掉響地就走左，佢更誇張埋單消費 NT$30。唔係好話，直頭唔好聽，欺負農民都係奸商，呀你又唔係做生意，去玩唔好玩到咁，門口有現成隨你揀就唔揀，要自己掘，掘中細支就掉低咁仲有無人要呀? 人地都無收你人頭入場隨你玩，做人要有品至得，千祈唔好教壞細路，我地仲要係香港代表，唔好攪臭香港個朵呀!

艾笠墾丁 2 - 40人專業台灣包車服務, 免費行程安排, 可指定香港人導遊