高雄 - 螃蟹薑母鴨 - 艾笠私伙遊記

冬天黎台灣四圍都見到有人食薑母鴨，一般薑母鴨都係用紅面鴨公、米酒、老薑、麻油一齊煮一窩野，再好似打邊爐咁掉野落去煮黎食的。台灣人對薑母鴨可以話係瘋狂，特別係寒流期間愈夜愈多人，就算坐出馬路吹風都係圍埋食。我黎台灣扮台灣人咁耐，當然要跟足啦，每個冬天都會掛住薑母鴨嘅味道，秋冬一定要好好補返下先得架麻。

今日食呢間勁野呀，總店響屏東，紅極一時，依家開分店到高雄，踩到黎我個場梗係要去試下啦。有咩咁把炮呢?! 一睇個招牌就知唔係普通料黎，係食螃蟹薑母鴨，你睇我七點幾黎已經人山人海了。

(傳) 螃蟹薑母鴨
地址 : 高雄市三民區大昌一路186號
電話 : 07-3836210
Facebook : https://www.facebook.com/pages/%E5%82%B3%E8%9E%83%E8%9F%B9%E8%96%91%E6%AF%8D%E9%B4%A8-%E9%AB%98%E9%9B%84%E5%BA%97/320533114738149?sk=timeline

顧名思義就梗係食蟹架啦，又係食處女鱘，價位 NT$500-300 不等，價錢無東港咁平，但尚可接受，始終都係坐低食麻。

基本上薑母鴨有湯底同鴨肉一鍋，其他料另叫，蟹連雜項全掉落去一鑊熟。

通常鴨肉係最後先食，因為會愈煮愈嫩，唔洗咁急，一開波飲啖湯，試下湯底咩味先。佢湯底比較清，老闆話無落米酒，有原因嘅，因為重點要食蟹，個湯底無咁重口味先食得出蟹羔溶落湯嘅鮮味，不過我始終係一個老餅鄉下仔，都係覺得咁食就無薑母鴨嘅 feel，但係你只要唔當佢係薑母鴨咁食，或者你從未食過薑母鴨的話，可以試下，湯底鮮甜同薑味都夠，一開始挑戰傳統薑母鴨的話，怕你接受唔到。

麵線係必點丫，蒜頭麻油撈麵線，加少少湯更有風味。

鴨紅爭 d，無咩味道，可以 pass。

鴨腸幾新鮮，去雪櫃自己攞的。

主腳隻蟹都好正，新鮮到放落鍋仲睇住佢掙扎的，陰功，不過見到 d 羔都唔理得咁多，鮮甜味美無得頂，完全明白個湯就係要就隻蟹，如果傳統薑母鴨湯底一定搶過晒蟹嘅鮮味，咁掉隻蟹落去真係浪費。

醬料架生都係自助式，個醬一般，不過不失。

落單時店員推薦食米血糕，有睇過我遊記都知，我講過三百幾次米血係好難食的，不過在坐幾位都係台灣人，咁我又唔會咁自私唔俾大家叫架麻，店員再三提醒，因為只有老闆識炒，所以要等，等幾耐亦唔知。講到咁神化，梗係老虎蟹都等啦。結果真係喜出望外，我強烈推薦大家一定要黎試下，"從來" 真係從來我都唔會去夾第二舊米血放入口的，上菜嘅時侯真係有 d 忘記左有叫呢味野，黎到我亦係硬住頭皮話試下，點知原來係秘密武器黎，老闆有返兩下散手，炒得好香好脆，表面嗰層直頭有 d 米通 feel，甘香酥脆完全無一般米血嘅噁心口感，我清左半碟，完全幫台灣米血贏返漂亮一仗。

唔係講笑，食完忍唔住摷返部相機出黎影多張，我黎左台灣五六年食過米血糕嘅總和都唔夠今晚食得多，一定要試。

總括黎講大家黎食螃蟹薑母鴨嘅時侯基本上就係當蟹鍋食就好，完全無問題係好食的，不過同我上左癮嘅傳統薑母鴨係兩回事，不能相提並論，重點係一定要試炒米血糕，小心雪櫃係有一般平民米血糕的，因住乃野，總之落單前問定洗唔洗等，要等就中喇，夜一夜都要等。呢餐四位埋單 NT$2000，價錢算合理。建議大家覺得口味唔錯的話，再去試試傳統薑母鴨，值得一試的。

艾笠墾丁 2 - 40人專業台灣包車服務, 免費行程安排, 可指定香港人導遊