高雄 - 艾笠珍奶全攻略 - 艾笠私伙遊記

講到自己係南部達人咁把炮，就梗係要有返兩下散手啦。成日同黎玩嘅朋友講，有咩想玩想食想搵都可以直接講，只要你有目標我就有計㗎喇咁話。有圖連真相放晒上黎俾大家睇下，"珍奶" 即係珍珠奶茶，好多朋友黎到都話要整返杯，咁我通常都會問你想飲咩口味，甜 d 奶 d 定珍珠要大粒 d?! 好多時得到答案係 "咁複雜嘅咩下?!" ，係㗎~ 做人係要有要求先得㗎麻，咁我就挑戰自己個腎，一次過飲晒高雄有名有姓嘅珍奶俾你地睇下啦。

台灣一般呢類型賣野飲嘅地方都統稱為手搖飲料，kawaii d 就叫搖搖杯，啱啱興起嗰時都係人手搖架，所以台灣人比較少 bye bye 肉，呢 d 手搖飲料店賣嘅野飲都五花百門，總之咩茶咩果汁都可以搖埋一齊飲落肚，裡面配搭亦分得好仔細，每次講完要飲咩之後都會問你"甜度冰塊"，有 d 鋪頭淨係甜度都分八級，所以知訂就要諗好先落柯打喇。

For Example : 波霸奶茶半糖少冰 (因為珍珠有分大細，波霸就梗係大啦，而半糖少冰呢，就真係半糖同少冰囉...)

春水堂

地址 : 高雄夢時代 D 區就有，響廣場外面的

網址 : http://chunshuitang.com.tw/store.php?d=3

講珍奶就真係唔可以唔講春水堂喇，因為佢自己話係珍珠奶茶嘅開山鼻祖咁話，至於係唔係堅呢，咁就真係無從稽考喇。咁點解春水堂嘅價錢係爆燈呢? 因為百幾蚊台仔飲杯珍奶就真係得春水堂敢咁賣，但係凡事又唔可以單睇個價錢嘅，更何況出得黎行，如果係值得的話，百零蚊又唔怕洗。

首先春水堂係今次介紹咁多間珍奶裡面唯一可以坐響度飲嘅地方，咁好正常鋪租你係有份俾㗎啦。每位低消一杯野飲，個人認為合理的。

仲有呢，其實杯野算大杯架，基本上佢都焗你飲大杯架喇，因為中杯跟本就係 espresso size 黎，平日有 85折大杯都抵飲嘅。至於珍奶本身呢，春水比出面嘅珍奶淡口味 d，奶味同茶味都唔係好突出，不過珍珠係 very good 嘅，比外面嘅珍珠細粒 d，可以話無咁有口感，亦可以話無咁滯，呢樣野真係好睇個人喜好，好似 50嵐咁，就可以自己揀要大珍珠定細珍珠喇。

題外話，我自己就幾鍾意佢嘅胚芽奶茶，即係小麥發芽嗰個頭呢，好刁鑽下架，麥味幾香，配奶茶的確唔錯。

佢仲有其他唔等洗野食添，好似呢兜滷味咁，裡面有鴨血糕，我相信只有台灣人鍾意食，多個鬼佬最怕食物榜，鴨血糕都名列前矛，一場黎到你都可以試下。鴨紅豬紅我食，糯米我都食，但係兩位響埋一齊我就頂唔順，真係唔知點解。

茶湯會

地址 : 連鎖式經營，全台灣都有分店，可以上網 check。

網址 : http://www.teapatea.com.tw/store.php?city=15

其實茶湯會就係春水堂嘅平民版，同一間野的，口味當然亦係差唔多，但唔知點解茶湯會珍珠係正常大珍珠黎的，同樣茶味同奶味都唔太突出。

叫得佢做平民版就梗係價錢上有分別啦，同其他知名搖搖店價錢差唔多。

雖然南部地區比較熱，但一樣有熱飲俾你揀。

茶湯會好易認，見到個牌匾就知係佢喇。

50嵐

地址 : 連鎖式經營，全台灣都有分店，可以上網 check。

網址 : http://www.50lan.com.tw/shops_c1.php

又係四圍都有嘅連鎖店，曾經亦中過佢毒，每次黎台灣都一定要飲，上機前再番炒嗰隻，後黎香港都有開，但係口味真係唔同左。台灣分店好好多，一黎四圍都有，二黎水準 keep 到，珍奶有分大珍珠同細珍珠，細珍珠真係好細粒，同西米露咁上下大，未試過可以試下，幾得意的。奶亦有分鮮奶同奶精，鮮奶當然係健康 d 啦，但係好味嘅野永遠都係無益架麻，所以奶精係好飲好多架，50嵐奶味同茶味都配搭得好好，唔會太濃太淡，但口味偏甜，一般香港人唔覺有咩問題，照樣叫佢全糖俾黎，但係台灣人無咁重口味，半糖算好肥仔架喇，佢地一般都 3分糖架咋，可以依自己喜好 order 甜度啦。珍珠部份真係業界標準，大珍珠口感一流，軟硬適中，有咬口得黎又唔會太硬，所以 50嵐係穩陣之中嘅穩陣之選。

價位唔平唔貴，夏天我鍾意飲 "芒果青"，即係芒果雪糕 + 青茶，或者 "多多綠" 都係我杯茶，即係益力多 + 綠茶，死未?!

50嵐基本上係搖搖界指標，什麼貢茶響台灣跟本無人飲的。

雙妃奶茶 (高雄限定)

地址 : 高雄市鹽埕區新樂街173號

營業時間 : 星期一至星期日 9:00-22:00

好喇，跟住黎 d 好野喇，高雄鹽珵區有好多老店，同一條街就有兩間珍奶都出名到無高雄人唔識。先講呢間雙妃，個名同出火一樣咁衰，好多人聽到又陰陰咀笑，帶佢黎試過嘅朋友都念念不忘，雙妃口味無咁甜，所以比較飲得出茶味同奶味，茶味唔會好濃，奶係鮮奶所以亦唔係咁出，珍珠口感比 50 嵐林 dd，不過不失彈牙感覺，響台灣生活耐左，口味都有改變，慢慢覺得 50 嵐真係太甜，依家都鍾意飲雙妃呢種，唔會死甜嘅口味。

價錢比其他連鎖店平 d，但係記得雙妃係無甜度揀，啱我，唔洗煩，俾錢行得，大杯 NT$40。

好多老店都係用呢款架生，幾得意架，好想知佢個開關到底響邊，哈哈。

雖然雙妃隱藏響巷仔裡面，但係唔好睇小佢呀，好多人都知訂專登黎買架，有時仲要排隊添，真正客似雲來好好生意架。

樺達奶茶

地址 : 台灣高雄市鹽埕區新樂街99號

營業時間 : 星期一至星期日 9:00-22:00

網址 : http://www.fonfood.com/store/952486/branch (分店地址)

同一條街另一間猛野叫樺達奶茶，可以講話識做生意 d，因為分店比較多，百貨公司 food court 都有得賣，所以知名度高 d，鹽珵呢個係總店，所以阿姐會睇唔係幾到你，請自行執生。

至於杯野黎計，比雙妃再無咁甜，所以茶味會出 d，珍珠再林 d 不過有少少甜味，同樣咩都無得揀，如果唔飲咁甜，可以加普洱茶兩溝，算係比較特別嘅飲法。

一樣大杯 NT$40，寫到明行得麼就無珍珠，唔加冰有好處就係可以慢慢飲都唔會變淡，其他分店口味亦一樣的，唔洗特登黎總店。

花邊野，樺達對面有間咁嘅野，年青人睇鋪，完全唔知賣乜，八卦走去問下。原來佢地係個 group，等有興趣想環島遊嘅人聚埋一齊，搵腳一齊出發，idea 幾好，不過唔知實行成點，我自 high 同佢講我想環島好耐，結果佢好冷淡地應左我一野就算，可能我對於佢地黎講已經超齡，心諗你行開啦阿叔。

我呢位阿叔仲好唔識趣咁問佢，咁你地點賺錢? 佢開頭話唔賺錢架，我梗係唔信啦，我話咁你都要食飯架，佢先攤開塊布黎講，呢堆野係要錢買的，塊布無記錯好似千幾蚊台仔。

返黎有睇過佢地 website，感覺應該仲摸索緊，希望年青人會搵到自己嘅路，遲下話唔定有 d 更創新嘅旅遊方式，大家經過可以去八下。

我在旅行 Facebook : https://www.facebook.com/iamtraveling

總括黎講各有特色，所以下次黎玩話想飲珍奶，可以講明想坐低 high，定係想飲甜 d 啱香港人口味，又或者係要茶味濃 d 嘅珍奶，我地就識帶你去架喇。其實我自己鍾意雙妃多 d，一黎個名夠衰，二黎各樣比例都好好，雖然地點比較煩，但係值得一試，so far 帶咁多人去試都無撻 Q，想試新野又打穩陣牌就 good fit。同埋今次主要係試珍奶，坦白講春水堂對我黎講係輸，不過春水堂主打係有其他台灣茶飲，好似鐵觀音呀，烏龍茶等等，又好似 50嵐咁，珍奶同雙妃又係無得比，不過強在有好多其他野揀，每樣野都有返兩下散手，總之各有強項，有勇氣的話隨時搵到你自己杯茶。珍奶始終係台灣之光，真係飲到厭先對其他下手吧。

艾笠墾丁 2 - 40人專業台灣包車服務, 免費行程安排, 可指定香港人導遊