艾笠墾丁包車地圖 + 三日兩夜完美玩法

地圖說明:
星星地方都係景點~ 走馬看花兜一圈玩晒 8-9Hrs 差唔多~
最完美玩法係三日兩夜
Day 1 高雄到墾丁 + 半日遊
Day 2 墾丁一日遊
Day 3 海生館 + 回程高雄 + 景點

唔經唔覺又同大家玩左一段時間喇，雖然我只係一個賣時間附送血肉之軀嘅人，但我真係唔希望同大家嘅關係只係建立係金錢交易上面。所以每次都好重視賽後檢討呢一 part，一開始梗係好主觀咁推薦我自己鍾意嘅野俾大家啦，經過實戰同大家去玩過食過都好想知大家點睇，咁我先可以綜合大家意見做得更好㗎麻。

所以 2015 年嘅完美行程又有更新喇，大家可以昅昅先，睇下啱唔啱玩。

Day1 高雄到墾丁 + 半日遊 (順路先玩屏東，有分山線海線，墾丁西半島加減玩)

其實好多人都會問，山線海線要點揀，我地推薦邊條路線。通常我會直接話，我兩條都推薦，雖然好大機會俾人打，但係丫麻，唔推我會俾你揀咩?! 其實好簡單，主要睇大家想食海鮮定豬腳(客家菜)啦，咁講應該係最易做決定，即刻睇下兩條線分別有咩玩。

山線 : (連結 : 最新屏東一日遊行程)

高雄出發 > 心之和 Cheese Cake > 泗林步道 > 正宗萬鑾豬腳(客家菜) > 紫心樓 (天空之橋) > 原住民部落 (咖啡) > 萬金聖母殿 > 墾丁住宿

海線 : (連結 : 東港華僑市場)

東港華僑市場 > 大鵬灣國家風景區 > 白砂 > 出水口 > 貓鼻頭 > 關山日落 > 墾丁大街

山線 : 有無敵靚景天空之橋，天色好直頭見到高雄添，雖然要柞車上山，但綜合大家評語未有令人失望回應，值得推薦。

山線 : 萬巒除左豬腳，仲有客家菜食，又有私伙推薦鐵竇客家米苔目，又冠軍 cheese cake 又盛咁， 總之唔怕餓親啦。

海線 : 東港三寶之一黑鮪魚~ 每年四至六月有得食~

海線 : 大鵬灣其實好好玩，有勁大場地嘅高卡車，親子有豬車玩，有兒童禧水池，有沙灘車，有 Segway，木獨舟、風帆、高速水泡、大力水手連衝浪都有得玩，重點係成個場都無咩人，唔洗同人迫。

係咪山線海線都好吸引呢，不過因為兩條路線一山一海唔同路，無辦法溝埋一齊玩，如果兩邊都想玩晒，可以回程高雄玩埋另一條線亦得，如果鍾意食蝦，就建議回程先玩海線，因為有間食蝦專門店順路會經，平時開 16:00，一般情況下 19:00 賣晒，經過食兜蝦先再去東港食海鮮餐，之後買埋炭燒曼頭第二朝早餐，都話唔怕餓親㗎啦。

Day2 墾丁一日遊

船帆石 > 砂島  > 鵝鑾鼻燈塔 > 最南點 > 龍磐公園 > 風吹沙 >  下午茶 (optional) > 港口吊橋 > 佳樂水公園/佳樂水衝浪點 > 恆春古城 > 出火 > 晚餐 > 墾丁民宿/回程高雄

恆春有個地方叫出火，夜晚去睇先知有咩特別，所以就一就出發時間就可以天黑先去出火喇，建議冬天 11:00am - 12:00pm 出發，夏天 12:00pm - 1:00pm 出發就 fit。

其實墾丁變化都好大，依家暑假旺季行景點還可以，因為地方都叫夠大，但講到食飯就麻煩 d ，如果同行有小朋友老人家的話，最好預早同我地講，預早安排食飯時間會好 d。唔係一夠鐘放飯，四圍都爆，國家公園又唔俾燒雞翼，咁大家真係食蕉，意思係真係得香蕉可以食。

特別一提係依家出火認真地執行禁止玩煙花，原因係我地香港人攪寸左個 party ，有片為證上晒新聞，我地會盡責任提醒大家守法，希望大家亦多多合作，唔好俾人笑我地同陸客無分別。

Day3 海生館 + 回程高雄 + 景點
墾丁民宿 > 海生館 > 高雄牛肉麵 (港園) > 駁二藝術特區 > 鼓山碼頭 (小食) > 夢時代 Shopping Mall (摩天輪 + 手信) > 機場親子農場 > 機場返香港

海生館即係 國立海洋生物博物館 ，相中鯨鯊已瓜咗，水族館黎計非常值得行下，物種非常多，不過同海洋公園唔同嘅係，海生館真係一個水族館黎，無其他野玩的，所以如果對海洋生物無興趣的話，可以住少晚墾丁，Day 2 一日遊後直接返高雄，咁就賺左半日可以玩高雄或者台南。

咁當然墾丁唔係話淨係得呢 d 野啦，不過有 d 已經俾強國人踩平左唔敢去，有 d 比較偏遠亦算係深度 d 嘅行程，好似四重溪溫泉/騎馬、石門古戰場、牡丹原住民部落、龍坑保護區、旭海、港仔沙漠等，睇大家要求我地都可以幫你度身訂造行程，黎玩就記得搵我地喇。

唔止玩屏東墾丁㗎，仲有高雄同台南行程都好受歡迎，中部清境日月潭，到台東花蓮玩太魯閣都 ok，外島就真係無計喇，出去太耐個女會掛住我，哈哈。我地亦精心挑選好幾款車俾大家選擇，希望可以滿足到大家唔同需求，總之黎台灣玩就 Whatsapp 我地問下啦，靠晒大家捧場，感激感激。

車款及價錢參考 : 台灣包車廣東話導覽服務

艾笠墾丁 2 - 40人專業台灣包車服務, 免費行程安排, 可指定香港人導遊

HK Tel : 81700438

Email : info@iLoveKenting.com

Web : www.iLoveKenting.com

Facebook : http://www.facebook.com/iLovekentingHK