高雄 - 季節限定採超甜鳳梨+玉荷包荔枝

其實好多人都覺得高雄無野玩，我就覺得係大家太信得過高雄捷運了。捷運可以去嘅地方實在非常有限，如果只係坐過捷運玩高雄就下定論，可能你會錯過左唔少好嘢。就等如一直以黎大家高雄落機都直闖墾丁，錯過左屏東嘅景點一樣，希望等我行先，食過玩過再推薦值得玩嘅俾大家睇下，咁以後黎玩，行程就豐富好多啦。

體驗農場 
現採鳳梨 每位 NT$200 可以任揀一隻帶走
玉荷包荔枝 每位 NT$200 可以帶一斤走

距離高雄市中心約 50mins 車程，順路可以去埋佛光山食個齋參觀下，採完可以去義大世界吹冷氣，過一過冷河亦得。

叫得做體驗農場，總要有返兩件道具柞柞手，上齊架生開工喇喂。

菠蘿真係食得多，不過一般都係食 Det Monte 罐頭，好少咁成個刨黎食，咁大塊菠蘿田真係第一次見。點解個個菠蘿仔都要包住呢?! 阿姐話要幫佢地著衫，唔講唔知原來菠蘿係怕曬的，會曬傷咁話。

農場主人一見到我就陰陰咀咁笑，心諗唔通又係貪我靚仔?! 非也，原來佢見我著短褲黎，菠蘿呢 d 咁有性格嘅野，連 d 葉都係尖架，驚刮花我對 42 寸長腿者，咁大家想玩就唔好學我著短打啦。

響我四圍八之際，原來阿姐已經急不及待，起勢咁切菠蘿俾大家食，唔係睇住佢切都唔信原來菠蘿係可以咁甜，甜過罐頭果啖糖水。

阿姐仲好專業咁介紹鳳梨種類，亦傾囊相授要點樣揀鳳梨，有得食有得玩仲賺埋知識，咁大家梗係無投訴啦。

最後我揀左個細細地嘅試下，結果同阿姐揀嗰個無得比，但歡樂無價。

每位都有收穫，玩得好滿足，你地玩啦玩啦。

我坐埋一邊，靜靜地將盤菠蘿食晒，真係好好食，講堅的。

同一個場就有高雄特產玉荷包荔枝，又係即開即食試過先再傾，玉荷包係咁青青地架，唔會成粒紅晒。今年台灣缺水，足足有八個月無落雨，今年荔枝細粒左好多，不過已經食左，仍然好甜無失威。

現採又係享受個過程，樹上熟又好似真係好食 d，現場任食之餘仲有一斤可以帶走，有多再貼錢就 ok。

有得食有得玩有野學，絕對無投訴，不過要食晒菠蘿同荔枝真係得五六月可以，因為玉荷包產期極短，有興趣記得把握時間，除左生果，其實都可以感受下高雄簡樸嘅一面，同埋講真真係唔會無野玩，睇下肯唔肯用心做功課嘅者，呢個行程接受度好高，暫時係我地依家最熱門嘅行程，咁就好喇，第時老左我可以種下菠蘿，都有餐晏仔食下。臨走阿姐可能見我又戴帽又盛咁，一人醒左支菠蘿冰我地飲添，好正呀，下次買都要買支，佢地仲有好多鳳梨醬呀之類，不過唔太識做生意，要問先羅出黎，都好嘅，唔洗太商業，keep 住呢份簡樸單純就已經係你地最殺食嘅特色喇。

順帶一提附近其實仲有間庭園餐廳幾好玩架，可以帶小朋友去滑草，飲杯咖啡等日頭無咁曬先做農夫丫麻。

艾笠墾丁 2 - 40人專業台灣包車服務, 免費行程安排, 可指定香港人導遊

HK Tel : 81700438

Email : info@iLoveKenting.com

Web : www.iLoveKenting.com

Facebook : http://www.facebook.com/iLovekentingHK