台中 - 南投賞楓秘境奧萬大

本來呢條路線係諗住加入清境行程裡面的，因為如果我哋要上清境，基本上係同一條路，直上就係清境再上就係武嶺，中間轉入另一條山路就係奧萬大喇，沿途山路已經有難度，絕對唔適合自駕，但風景一流，沿萬大水庫可以遠眺清境一大堆民宿，亦可以睇到日治時期日本人響台灣嘅偉大建設。不過到奧萬大旅客中心大家就要落車改用行架喇，吊橋風景無敵靚，如果玩埋航拍真係無得頂，亦係賞楓秘景，要行幾耐呢？一來一回我行左 3Hrs，上落山樓梯山路都有，個人評級為難度三星，唔行唔知身體好。

每次有旅客問中部行程，九成都會去清境，但係大家可能太睇小呢條路，其實山區天氣變化大，中午過後一般都會起霧，亦有機會落毛毛雨，能見度低，加埋天雨路滑，未計唔守規矩嘅逆線扒頭同埋拓海運菜車，通常都係有經驗嘅駕駛者先知有幾驚，唔知驚嘅先係最危險。有圖有真相，相中係七月份下午一點時嘅武嶺。所以好多人問行程都話想即日來回，台中機場直上清境行一行又衝返落山住台中，坦白講我哋真係無本事接，因為我哋想平安返屋企，安全第一，都係排個安全嘅行程玩啦，日數唔夠就下次囉。再講咁樣玩，你超過一半時間都係坐車，仲要係山路，如果可以（即係前面無大巴）我揸得快你又會暈，揸得慢你又以為我揼波鐘，好不容易上到山，行一行都未睇清楚係霧定係花就趕住走喇，毫無品質可言，最後一般都係不歡而散，無下次，對我地前線工作者黎講更加係吃力不討好。當然每個人旅遊習慣唔同，都係嗰句最緊要係啱玩啦，我哋排行程都係好主觀，但係呢 d 路線我哋都係自己行過玩過先放出黎，所以安全考量係值得參考，

言歸正傳，咁奧萬大應該點玩呢？由於香港直飛台中一般都係中午點幾鐘先到，硬住頭皮上山就撞正起霧，我哋梗係建議你住一晚台中先啦，行下夜市玩下市區行程先，可以參考下台中觀光局請我地排嘅台中行程。
http://ilovekenting.blogspot.tw/2015/02/blog-post.html

大家養足精神第二朝早 d 出發，仲有時間玩埋沿途景點添，好似寶島時代村都幾得意架。

跟住就可以上山，車程約 2Hrs，山區食飯就無咩選擇，奧萬大裡面得一間餐廳，我地可以先幫你訂餐，食少少野先出發行山。相中就係萬大水庫，遠處山頂 d 屋仔就係清境喇。都係嗰句『好近啫，翻過呢兩座山就到！』

未出發先興奮，有親子路線去睇瀑布，來回約 1Hr。我係為吊橋而黎，梗係要去攻頂啦。

入口處無咩驚險場面，生態池好多蛙叫但見唔到蛙，部落有好多小朋友用呢度嘅木造小提琴，值得參觀一下。

見到呢個牌就知到入口喇，除左提供大家量力而為，亦有提醒要注意天色，太晏就唔好入山喇，搵自己黎攪仲攪到人添，奧萬大係國家森林遊樂區，可以預約導覽人員帶你地行的，有需要可以預先同我地講。

好一個好漢坡，因為到目前為止都係平路，心諗你嚇鬼咩，照行。

跟住一路都係落樓梯，我去嘅時候未係旺季亦係平日，沿途耐不耐都會遇到旅客，因為滾落山我最快，扒左幾個人頭就沾沾自喜，仲見到好幾個回頭嘅旅客面都青埋坐響樓梯，心諗人地門口咁大個牌，話左你聽扮勁無錢淨㗎啦。跟住有上山路段，開始有 d 莫氣，大概行左一個鐘多 d，見到個牌話仲有 850公尺， Yeah~ 近喇近喇。

經過一輪上斜，體力消耗比較快，大部份旅客都會停留觀鳥平台休息，回一回氣再上，你睇~ 見到吊橋喇，翻過呢座山就到喇。

奧萬大好多楓葉架，十一月開始最靚，我十月初去未見起色。

抖咗一抖就向吊橋出發，一轉彎只見到樓梯，見唔到頂⋯⋯

撐左大概 15-20mins 先到頂，上到去見到呢堆野真係爆左一個字出黎，我唔信有人玩，你估個個都係甄子丹咩，頂你起張凳黎坐下實際 d 丫。

之後都係平路，可以回一回氣，限人數 110人行架咋，記得數住人頭呀。雖然無乜人》

吊橋景色非常靚，亦好穩陣唔洗面青，但係吊橋中間好大風，山區天氣亦比較涼，行到一身汗，俾佢吹一吹有 d 凍添，對面成山都係楓葉，有涼亭可以休息，吹吹風煮返杯咖啡飲下，坐返夠本先返轉頭。我下次去一定帶航拍機去，真係無敵靚，行到抽筋都值得。

建議大家有興趣的話最好預約導覽員一齊去啦，沿途有個照應之餘仲好多野聽好多野學，因為路段真係有難度，如果要兼顧做司機，我就唔太建議陪你地行喇，山路又比較費神，所以我地可以先安排國家風景區嘅導覽人員陪大家玩。

之後返轉頭就梗係知道錯啦，接近入口處嘅地方變左上樓梯丫麻，水又飲晒，面都青埋坐響樓梯抖左幾轉，返到去腳都軟埋呀，不過我見好多小學五六年班嘅小朋友一齊行，台灣人真係堅，一般香港旅客行完鵝鑾鼻燈塔就跪低喇，話要搵地方坐低飲杯野先，我個女兩歲就同媽咪陪外婆同阿嫲去睇瀑布，自己行足 1Hr，上車就梗係昏迷左啦，不過都估唔到佢行到咁耐，小朋友都係放養比較好，大家有行開山的話值得行奧萬大呀，跟住 book 返晚溫泉酒店泡個湯，幾梳肝，第三日先上清境清清草原同武嶺，住唔住清境就睇之後行程同想唔想睇日出喇，都一樣啦，有日期人數我地可以幫你排排，大家討論下，啱玩咪行囉，就係咁簡單。

艾笠墾丁 2 - 40人專業台灣包車服務, 免費行程安排, 可指定香港人導遊