屏東 - 親子朱古力 DIY

我地黎台灣南部玩，好多人大目標都係墾丁，但其實墾丁只係屏東裡面其中一條街。我地從高雄出發，係要穿過整個屏東縣先會到墾丁架，而屏東係台灣第五大縣，大家白白坐 120km 路程會唔會錯過左 d 咩呢?


所以我地一般都建議大家順路玩埋屏東先到墾丁，包足司機一日車，大家都唔洗趕，自然可以用安全車速陪大家慢慢玩。大家暑假帶埋細路黎玩嘅，要小朋友坐定定兩個鐘，大人同小朋友都辛苦，大家經過屏東可以帶小朋友去巧克力農場，體驗下巧克力 DIY，有野俾細路玩下食下先再出發，值得諗諗佢架。

屏東係個好得意嘅地方，雖然鄉下，但可以話係臥虎藏龍，慢慢掘下其實又幾多野值得玩，呢個可可園係我地屏東山線順路行程，D 個 IY 再去食 "曼聯" 豬腳最 fit。

最新屏東行程推介
http://ilovekenting.blogspot.tw/2015/01/blog-post.html

開放式工場俾大家睇清楚晒佢地朱古力生產過程，佢地亦會有解說講解點樣從可可果變成我地食嘅朱古力，有野玩有野食有野學。

呢個就係可可喇，唔黎我都唔知原來可可樹係咁矮架喎。

裡面朱古力產品選擇好多，夏日炎炎梗係食個雪糕飲杯冰沙先再傾啦。

一開波就講左我地係為 DIY 而黎，有時段之分，唔洗擔心，附近好多景點可以玩，時間容易就。

入去櫃台報名俾錢，DIY 體驗每位 NT$200。仲可以試食佢地自己生產嘅朱古力，100% 嘅朱古力唔係隨便食到，但我份人都唔係咁隨便， 75% 我最乃，個人覺得係 Godiva 等級的。

如果你同我一樣唔知點揀，佢地名碼實價 list 晒出黎，亦可以好唔客氣地每款了 d 黎試下，真材實料值得支持。

咁當然好多時都唔係我可以揀架啦，你睇佢已經揀好左喇，俾錢啦去。

攪完一輪終於黎到戲肉喇，兩個坐定定聽下應該點玩先。

唔洗講我梗係平日黎啦，老闆俾面專登開場俾我地玩，平時佢地要有一定人數先開 show 架。

一開始小朋友當然要大人協助啦，第一樣我地要做嘅係朱古力餅。

之後姐姐就自己黎囉，佢好專心咁自己完成作品，我地想幫都唔俾，條頸有我咁上下硬。

仲可以邊整邊偷食，人生啊~

阿 B 就醒喇，專心食，完全無 Do 過任何野。

最後都得到媽咪 DIY 嘅作品。

姐姐做完餅乾，已經開始做 free style 朱古力了，過程中充份表現出自己個性，都好嘅，小朋友唔應該俾人框住，開心完成自己心裡面想要嘅作品，咁先夠 Art。

睇得出佢地好有做 DIY 經驗，全程好用心講解，遇到好似我女咁反叛嘅細路，都鼓勵佢用自己方式完成。小朋友開開心心攞住自己作品返去，爸爸媽媽仲有得食添，NT$200 真係超值，DIY 裡面用嘅黑朱古力都係 75% 純朱古力黎。所以小朋友淨係負責整嘅者，留返俾大人食好 d，大家暑假黎玩可以帶小朋友黎體驗下，希望大家都一樣玩得開心。

艾笠墾丁 2 - 40人專業台灣包車服務, 免費行程安排, 可指定香港人導遊

HK Tel : 81700438

Email : info@iLoveKenting.com

Web : www.iLoveKenting.com

Facebook : http://www.facebook.com/iLovekentingHK