墾丁 - 秋季大旅行之牡丹深度遊路線

其實聖誕都黎喇，不過墾丁嘅天氣只可以算係秋天，今年 11 月都未著過長袖衫，不過早晚溫差大，一日落就有風，所以呢個時侯黎玩，外套要跟身。日頭有太陽嘅時侯接近 30 度，但有風吹下好舒服，一年裡面呢段時間係最適合玩牡丹線架喇，留都留返依家先同大家介紹啦。



呢條路線我花左好多時間去玩，距離墾丁比較遠，一來一回都成百幾公里路程架，好多地方真係極少人到，就係因為無人，所以先吸引到我，有 d 地方需要行路，有山路有樓梯，按自己能力同興趣加減玩，如果想體驗，大家要有所準備啊。

從墾丁出發到四重溪大約 40-50mins 車程，接近溫泉區附近有個專業馬場，架生同馬都有質素，大人細路都可以體驗，可以騎馬過四重溪，野外騎馬體驗唔係四圍有得玩架。

跟住上去四重溪溫泉區，如果大家有諗住行，記得響呢度補給一下，之後就真係連 7 仔都無架喇。

四重溪係台灣四大溫泉之一，溫泉區有好多溫泉旅館，可以住宿或齋浸亦得，一般建議浸完就行喇，因為溫泉區食野選擇比較少，夜市當然亦欠奉啦。除左收費嘅溫泉旅館，仲有免費嘅大眾浴場，有公廁 feeel，想體驗亦可入去觀摩一下，哈哈。

最近政府有推四重溪溫泉區，開始有 d 建設，不過整下停下到依家都未正式開放。

浸溫泉前可以黎行個圈先，夜晚行都唔錯，不過因為未正式開放，古惑的燈係睇心情而開的。

點解會係神社唔係廟呢? 因為台灣大部份溫泉區都係日本人開發架，所以咪要整神社囉。

呢邊新起嘅大眾溫泉池就靚仔好多喇，不過唔好除褲住，係浸腳架咋，唔好用黎洗面呀，仲有水溫唔低的，唔好太衝動。

平時真係完全無人黎，不過個人道德問題，洗左先浸、洗左先浸、洗左先浸。

附近有間溫泉小學，到此一遊都幾好玩架。

我響未開嘅旅客服務中心昅到有單車放響裡面，我估佢地應該係借或租俾旅客用的，最近亦發現好多 "單車祕境" 指示牌，所以心癢癢要去尋幽探祕一下。結果沿指示一路行到呢度，意思應該係叫我回頭啦，但係我咩都未睇過喎，條路仲爛到裂晒，好彩我無聽佢點踩車入去者，頂你。

成個祕境係得呢條小路吸引到我，一路通入山唔知去邊，有朝一日等我換左四驅車帶埋穿雲箭先再入去挑戰。 PS. 呢條路應該唔係單車祕境路線呀下，踩車唔好挑戰喇，我柞私家車都唔敢入去呀，哈哈。

過左溫泉區就算係深度遊路線了，何謂深度遊呢? 即係有返咁上下深架，一般旅客唔明有咩咁好玩。旅遊業前輩教落，景點好唔好玩靠導遊一張咀，風景靚唔靚就靠旅客一雙腿喇。有投入過有付出過，自然懂得享受箇中樂趣，靠人地講幾靚幾好玩幾好味都係人地嘅主觀睇法，自己親身去感受先作得準啊。你睇相中唔係橋黎架，係樓梯，石門古戰場就響上面，自己去感受下值唔值得玩。

上面有個碑，因為歷史因素碑上嘅文字同想紀念嘅事都有轉變，原本諗住到此一 chok 自 high 下就算，估唔到呢個 view 會成為歷史了。執 keyboard 時岩岩睇到新聞，政府響無預警下將相中還我河山等字拆晒，新嘅要放咩上去未知，反正諗起就拆左先，之後會唔會變成歡迎自由行等字句，就讓我們一直看下去。

爬咁高上黎風景更係更上一層樓啦，可以遠眺四重溪溫泉區，唔算大景但有付出過覺得好爽。

繼續向山上行，會到達牡丹原住民部落，同其他原住民部落一樣，歡迎大家去玩，但無話開放觀光。咁即係點?! 即係去朋友屋企玩，朋友當然歡迎，但唔會無啦啦叫你朋友換套西裝出黎俾你影相掛，互相尊重係個非常值得玩嘅地方，每個部落都有自己故事同文化特色，運氣好仲可能有好野食添。

一路玩過去有牡丹水庫，附近有唔少原住民店鋪可以行下同老闆吹下水。跟住俾我見到呢個牌，未去過又去探下路，著住 GPS 一路片入山，期待睇下有無新發現。

結果又乃野，去到個遺址其實無咩遺留低，哈哈，個介紹牌都曬到甩晒色。

鄉長有好有心，山卡啦都立個碑留個名，不過真係無野睇，仲要條山路唔短的，好耐無試過響山玩得咁開心，睇地圖其實我翻過呢座山係可以通去另一面我要去嘅地方，好想衝過去行下，不過會錯過左今次想去嘅重點，時間有限所以決定走回頭路落返水庫，照原定路線繼續玩。

牡丹國小門口好靚，如果唔係上堂時間，大家可以入去行下的。

部落裡面嘅小學都好有原住民色彩，原來唔覺唔覺已經上左 290 公尺嘅山。

彩虹樓梯好有 feel，係必到嘅影相打卡位，可惜當日無 model 影，自己 chok 又驚俾小學生打。

對面有舊咁嘅野都幾得意，唔知用黎做咩，上去時都淆淆地，但原來出乎意料咁穩陣，哈哈。

跟住往環島有名嘅壽卡方向行，會經過東源濕地，感覺係個好有靈氣嘅地方。

我地要睇野薑花的話就係黎呢度睇架喇，我去當日只有少量花開，但真係好靚，係個吸收日月精華嘅好地方。

有興趣的話可以去搵當地導覽帶大家行，我地就算再八，都唔會比當地人熟悉呢個地方，跟佢地玩又有故仔聽，亦真正帶動到當地旅遊業，個人認為係個深度遊嘅完美玩法。行完濕地可以繼續去壽卡進發，路係可以通去台東，所以係環島人必到打卡位，如果你係踩單車的話，絕對會畢生難忘，揸車就無乜 feel 喇，所以我一般都回頭返牡丹玩。

之後會經過旭海溫泉，水質唔係特別靚，但政府整理好之後，俾返原住民朋友管理，收費大眾化，設備亦唔錯，黎露營認真棧。

今次重點係要黎潘朵拉，小小一間士多仔，亦唔係特別好食，但很有意思，老闆係個好有故事嘅人，唔少環島嘅朋友會黎打工換宿，店內亦有好多小朋友係老闆照顧的，我地響度食一餐，足夠佢地幾個人食飽，同過我去玩嘅朋友都知我風格從不強逼消費，但今次例外，大家黎度唔理你，水我都焗你買支先準走，哈哈。

d 仔仔女女都好生性，會主動幫手準備餐飲。

愛心爆棚，牛肉麵好重料，仲有特調咖啡值得一試，因為有加小米酒的，最後留到返屋企先飲，哈哈。

食飽就要消耗下喇，旭海草原非常正，但請準備行山心情同裝備，我第一次去嗰時著牛仔褲，帶晒相機腳架去，一路行一路俾人問，唔係問侯我，只係驚我頂唔順者，哈哈。

沿途風景無敵，面對太平洋，天氣好的話可以睇到蘭嶼同綠島，一分錢一分貨，同龍磐公園個景又係唔同等級，我影相差無辦法影俾你睇，親身感受過你就知台灣有幾靚。來回唔到 10km，其實難度唔高，睇到牡丹灣風景，亦係個睇日出嘅好地方。

跟住落返山到海邊，旭海有個灘，全部都係鵝卵石，成個海岸線都係，我每次黎都響海邊坐好耐，夏天可以帶隻蛋黎煎，呢個天氣真係岩岩好，又係環島人必到打卡位，附近仲係好出名嘅阿朗壹古道入口添。

超級舒服嘅地方，堆石頭有好多唔同講法，但我自己就純綷堆過癮，小朋友黎飛石仔都夠玩一日喇，唔夠皮可以留響度飛，飛一年都飛唔晒，如果戶口 d 錢好似呢度 d 石咁就好囉，許願先許願先。

跟住落黎就係港仔沙漠喇，成個沙漠都係海沙黎架，水清沙幼踩落去好舒服架，以前一直都俾人霸左黎玩吉普車，依家政府禁左，我覺得係好事，但同時當地人生計又有問題，當地人同政府相討緊結合生態旅遊方式俾大家玩，期待佢地新方向新玩法，可以保護到呢個地方，又可以維持返觀光旅遊工作。

港仔之後就入山路，翻過去就係滿州喇，可以通返落恆春。行程要玩一日都玩唔晒，要睇興趣加減玩，如果想浸溫泉亦可以掉轉玩，last 先去四重溪浸溫泉亦得。以上路線每個景點都係影個門口咋，每個地方都有自己嘅故事，有心黎玩再同大家慢慢分享，美景留返俾大家自己去感受，希望大家都有收穫，好好去享受一個旅程，提多一提呢條路線夏天唔太適合，阿朗壹同南仁湖都要申請先入得，出發前先同我地夾一夾行程就 ok。

艾笠墾丁 2 - 40人專業台灣包車服務, 免費行程安排, 可指定香港人導遊 

HK Tel : 81700438
WhatsApp : +886987913818
Email : info@iLoveKenting.com 
Web : www.iLoveKenting.com
Facebook : http://www.facebook.com/iLovekentingHK