高雄 - 傳統福州麵線親子 DIY

黎台灣個個都話要食阿宗麵線，但其實麵線係乜，好多人包括我自己都唔知究竟係乜黎，直至我地參加左呢個麵線 DIY，除左有得食有得玩，其實仲對呢門手藝更有認識，同時亦非常欣賞老闆嘅用心。
原來目前全世界只有三個地方有手工做麵線，分別係台灣、日本同埋中國，潘老闆已經係台灣最年青嘅師傅，對上已經係超過六十歲喇，即係話呢個行業有廿幾年真空期。點解會咁呢? 好明顯就係大家都傾向機器量產，賺錢優先啦，仲同你慢慢搓咩。所以我地先特登要帶小朋友黎體驗一下，一黎希望佢地知道食物得來不易，要好好珍惜，同埋想佢地都對傳統手藝多 d 認識，唔一定要做師傅，但至少識得尊重傳統手藝，唔好等佢白白流失。 

姐姐最鍾意 DIY，平時媽咪做餅乾嘅時侯最興響旁邊攪攪震，今次聽到話同佢黎 DIY，成個禮拜都好聽話，對爸爸媽媽黎講真係賺左。 

一開閘嘅時候梗係最興奮啦，姐姐細佬有理無理都叉隻手埋去先，大家都有洗乾淨手架，唔係都係自己受返架咋。 

攪到一手都係先開心，從小培訓，驚佢第時嫁唔出。 

跟住師傅指示，大家一步一步跟住做，其實真係要付出好大體力架，媽咪話好過去做 gym。 

小朋友好投入，不停將個麵團搓圓再撳扁，其實呢個程序要重覆好幾次先有效果，每個星期黎玩一次，保證同 bye bye 肉 say goodbye。 

在場小朋友個個都玩得好開心，場地安全又任你玩，去邊度搵。 

老闆都無渣流灘架，無冷場不停跟住佢做，整唔整到唔緊要，最緊要拋得下。 

付出過精神同汗水，返屋企真係食晒碗麵架。 

師傅話要知道自己造嘅麵團合唔合格，自己吹賬佢黎試下就知。 

你睇下我地個麵團吹到地球咁大就知係堅啦，不過只維持一秒左右就俾細佬篤爆左喇，哈哈。 

之後師傅即場示範，點樣將麵團變成麵條，呢檀野咁靚就梗係師傅整架啦。 

至於我地自己攪嘅呢，就似大腸麵線 d 大腸多 d，證明練拳唔練功，到老一場空呀。 

仲未掂架，不過因為我地做麵條已經斷左纜，跟手就要係方太教煮餸時間喇，師傅梗係知道你地鑊氣啦，一早準備好麵條示範，俾大家睇下麵條點樣變成麵線。 

由於時間關係，師傅幫大家準備好麵條俾大家體驗下造麵線最重要一環，就係拉麵線喇，有得玩梗係開心啦，但其實我地一拉，已經斷左好多喇，靠自己整真係要食麵粉都似。 

師傅仲教我地點樣睇麵線係咪手工造，純手工造嘅個頭係粗嘅，到中間個麵肚先係線咁幼，原來食麵線都要揀腩位黎食嘅，唔講真係唔知。 

你睇佢真係將條大腸拉到頭髮咁幼架，食起黎梗係有口感啦，如果要學成，我諗我有廿年唔洗返屋企架。 


成個體驗我覺得好好玩，小朋友又投入又有野學。造完麵老闆仲有互動遊戲俾小朋友玩，又有小禮物鼓勵，親子 DIY 都做足功課。至於大人體驗過之後，梗係跪低認輸啦，呢個 DIY 難度係六星架喂，不過佢唔係要打擊你，只係想俾大家知道，原來食碗阿宗麵線，以前嘅做法係花功夫嘅，真係塞錢入你袋架。完場前當然有老闆出產嘅手工麵線可以買返屋企自己煮啦，有晒 menu 教你煮，跟住時間睇火就得，買一大抽返去厄下外母話自己造幾有 face，仲要一舊水台仔埋單，真係唔怪得無人學，攪成朝幾條友買寶礦力飲都唔止。我有問老闆可唔可以帶旅客黎體驗，因為平時佢要夠廿人先開 show 架，老闆話見我咁落力，實幫我攪咁話，大家黎高雄玩，有興趣就要早預約喇，大人 NT$200，小朋友 NT$100。


艾笠墾丁 2 - 40人專業台灣包車服務, 免費行程安排, 可指定香港人導遊 

HK Tel : 81700438
WhatsApp : +886987913818
Email : info@iLoveKenting.com 
Web : www.iLoveKenting.com
Facebook : http://www.facebook.com/iLovekentingHK