高雄 - 東港華僑市場 (8/2014 更新)

台灣物價大部份都比香港平~ 不過旅遊區就唔同講法~ 特別係大家到墾丁咁紅既地方~ 想食餐平靚正真係唔係話咁易~ 墾丁海鮮餐廳生意梗係好啦~ 你睇後壁湖年終無休~ 但係又無見佢成日有船返~ 就算有船返都係一兩箱魚~ 咁 d 魚到底響邊度黎既呢? 就係東港華僑市場黎架囉~ 所以帶你地到源頭搵食~ 就梗係平靚正啦~

顯示詳細地圖

8/2014 按 : 暑假期間大家都好俾面話信我去東港行下~ 大家食得 Happy 嘅同時我發現東港警察定期出黎捉停車~ 所以我地司機一般都要顧車~ 陪唔到你地玩~ 所以特此更新~ 希望大家睇完會更加了解有咩一定要玩要食~ 順便 update 下 d 相~

東港好近高雄機場架咋~ 大概 30-40mins 左右車程就到~ 東港有三寶~ 黑鮪魚 (即係吞拿魚~ 吞拿魚脯就係 TORO 喇)~ 櫻花蝦~ 同埋油魚子 (同烏魚子係朋友~ 但係係兩種野黎)~ 亦有人話係雙糕潤~ 每年四月底左右就開始有黑鮪魚食~ 最好食係上腹位置~ 油脂多~ 入口即溶~ 香味濃郁~ 響碼頭即劈即食~ 一片大概 NT$400~ 一定要試~

一生起碼豪一次~ 唔好諗~ 即刻食~

裡面賣魚生嘅真係好多~ 我自己覺得無固定攤擋一定得~ 最好行個圈睇下問下先~

所謂嘅黑鮪魚即係我地叫嘅藍鰭吞拿魚

吞拿魚有分品種之餘~ 貢大條魚唔同部位都唔同食法~ 行下問下長知識之餘~ 亦係旅遊樂趣之一~

可能我唔識食啦~ 我覺得呢邊師傅有時侯刀工爭 d~ 靚魚有機會切到有筋~ 可能真係無得同日本比~ 但係價錢亦係無得比的~ 所以建議大家黎食開心~ 你懂的~

新鮮就有保證~ 大大份咁食係幾爽的~

正所謂~ 美女廚房~ 食左先講~ 試過你就知道爽~

就算你就唔岩黑鮪魚季黎~ 東港亦會俾你留下美好回憶的~ 基本上華僑市場所有同海有關既食材都有得賣~ 最正就係自己揀~ 買完過隔離就有得代煮~ 食飽拍拍羅友走得~ 要食咩都有~ 真係抵食夾大件~ 不過著左一半人都會問~ 又話南部最大漁市場又盛咁~ 無游水魚賣嘅~ 因為人地係日日清的~ 無必要造個缸咁浮誇~ 你夜少少黎都收檔㗎喇~ 識行街市嘅都知~ 晚飯前黎執雞都係一個明智之選啦~ 收檔前執平野~ 不過夜左大概得返唔到一半攤檔仲有野賣~ 早買早享受~ 遲買平幾舊~ 去到邊都通嘅~

至於買完要點食呢~ 想食風味可以到大排檔代煮~ 想企理有冷氣可以去餐廳叫佢攪~ 嗱~ 不過台灣烹調方式始終都唔同~ 口味亦都唔同~ 台式口味我自己其實覺得好食架喎~ 無問題~ 不過好多人黎食都覺得同預期有落差~ 食唔到佢想食嘅煮法~ 如果唔係好想試新口味~ 一般我都建議清蒸白灼最穩陣~ 椒鹽亦好接近港式煮法~ 什麼三杯之類就唔好試喇~ 炒個蜆台灣都唔係用豉椒~ 用九層塔架~ 咪話我事前唔單聲下~ 哈~

呢度 d 檔口都係自己有船~ 隔少幾重~ 價錢真係非常抵玩~

當景點行都得~ 真係咩魚都有得賣~

處女蟳係你想像唔到咁平~ 整兩隻清蒸無得頂~ 同埋聽講話食完蟹唔可以食柿~

同一個場乾濕貨有齊~

雙糕潤有好多檔~ 可以試食先決定~ 特產都試左先啦~ 放心佢只係糕點~ 同潤無關係的~ 台灣唔知點解好興咁玩~ 太陽餅無太陽~ 綠豆蒜無蒜~ 所以雙糕潤都無可能有潤的~ 要食潤就去打邊爐啦下~

行街市小朋友未必唔啱玩架~ 短刺嘅馬糞海膽有無玩過先~ 不過玩下好喇~ 唔好太好食嘅者~

普通生魚片 (即係魚生)~ 一年四季都有得食~ 後壁湖無可能平過東港~

亦有懶人包~ 隔離就有檯~ 一人夾幾舊先繼續行~

呢 d 帶得返香港呀~

三寶之首我必選櫻花蝦~ 我定期入貨的~ 炒菜炒飯炒咩都得~ 落少少就好香~ Very Good~ 有買貴無買錯~

魚乾仔純綷個人喜好~ 落少少油同豉油極少量糖黎蒸~ 好好食架喂~ 唔信你試下~

掃完貨就可以過隔離大排檔叫佢攪~ 呢度相當老實~ 無聽過有任何古惑招數出現~ 大家可以放心玩放心食~ 唯獨是要注意~ 小心眼闊肚窄~ 買太多食唔晒~ 哈~ 東港另一特產叫雙潤糕~ 我自己就麻麻地~ 有試食~ 試過先買~ 不過有名既雙潤糕響碼頭對面~ 可以出去先買~ 我地平時去小琉球玩就係要黎東港坐船架喇~