台南 - 台灣黑輪2元 + 振發百年老茶行

黎台南玩好多人都會去食棺材板~ 但係我食過覺得只係厚多士 + 忌廉湯~ 唔 ok~ 推薦得大家食嘅梗係好野啦~ 介紹大家黎台南必食嘅 黑輪2元 食 "哦 lan" (台語黑輪讀音)~


同樣以安平路為中心~ 柞車到黑輪2元約 10mins 車程~ 係市區順路嘅景點~ 食完野可以去睇下附近百年老茶行~ 之後再去搵間 cafe 飲杯野~ 係咪好 fit 呢~

位於台南府中街口嘅黑輪 2元~ 特別在於特別平~ NT$2 一串起~ 

睇到有說明啦~ 其實唔洗睇價錢喇~ 鍾意食咩就攞~ 當日我哋兩條友食咗 NT$50 左右~ 無諗住食飽~ 因為仲有下場~ 同埋當日落雨~ 平時開到 7:00pm~ 但係未到 5:00pm 佢地話要收檔喇~ 你睇幾開心~ 所以我係邊行邊食~ 平時佢有位可以坐低食~ 食完 d 籤放籤筒~ 再去埋單的~ 幾有台灣味嘅地方~

食完野行多幾步到民權一路~ 振發茶行小小一間鋪~ 已經有 154 年歷史~ 唔係口衰~ 真係咸豐年到依家~ 唔信你睇~

振發茶行 : http://www.teashop1860.com/

台灣因為有高山~ 所以茶葉亦係好有名~ 有傳高山茶園係有富商包起自己留黎飲~ 同埋茶葉其實好蝦人買~ 你問我其實我都唔識~ NT$20 斤賣你 NT$20000 斤真係唔係新聞~ 旅遊業常見~ 

所以買茶葉就要去老字號~ 老闆娘好熱心解答我 d 戇居問題~ 唔會因為你問長問短先買一百幾廿蚊野而黑面~ 

老闆娘教路~ 先決定自己想飲係熟茶定青茶~ 再以價錢黎揀~ 咁就好快搵到你想要嘅茶喇~ 

最後買左有機茶俾我阿娘~ 盛惠 NT$600~ 返黎佢話好正~ 其實佢都唔專業~ 只係鍾意飲~ 不過啱口味就得啦~ 至緊要 Happy~

襯佢哋俾錢之際~ 我梗係四圍襯下啦~ 原來茶裏王廣告佢地有份拍嘅~ 

八卦之下發現原來呢 d 茶葉壺已經列為文物㗎喇~

印仔雖然唔係文物~ 不過幾得意~ 

基本上台南就係要玩呢 d 小鋪~ 發掘當中人事~ 響一個人情味爆燈嘅地方~ 行得快係無著數嘅~ 偶然停低腳步~ 你會發現台南仲有人整綿胎~ 好多老店都仍然快樂地生活著~ 大家快 d 響簡體字未入侵前黎台南行下~ 真係唔想呢種地方同香港一樣被寫進歷史~ 快~

艾笠墾丁 2 - 40人專業台灣包車服務, 免費行程安排, 可指定香港人導遊

HK Tel : 81700438

Email : info@iLoveKenting.com

Web : www.iLoveKenting.com

Facebook : http://www.facebook.com/iLovekentingHK