高雄 - 鼓山碼頭下午茶掃街攻略

每次幫大家排行程話去鼓山碼頭~ 大家都會話可以唔去~ 好多人都知鼓山可以坐船去旗津~ 但係未必知其實附近一帶係大學生蒲點~ 所以好多有特式但又好平民化嘅小食~ 下午茶黎搵食~ 跟住西子灣睇日落~ 再上壽山睇夜景~ 應該係中學就要知嘅常識~ 唔係諗住上咗大學先摷書下嘛~ 點把妹呀師兄~

同樣以三多商圈站 85 大樓為中心~ 去鼓山其實好近~ 坐捷運就唔近喇~ 行個大運先~ 鼓山碼頭屬於鹽珵區~ 好多野食架~ 今次集中玩左碼頭附近行到去嘅地方先~

響正碼頭對面第一間要食嘅就係阿嬤雞蛋酥~ 簡單 d 講就係台式牛脷酥啦~ 無牛脷酥咁甜~ 熱辣辣嘅時侯真係好好食~ 所以經常排隊排好長~ 值得排~ 因為大家都係等佢新鮮炸好即刻食~ 所以排隊其實係等佢炸~ 一出爐人潮清得好快~

蘇阿嬤雞蛋酥

營業時間 : 2:00pm - 9:00pm (星期四休息)

三種口味 (原味雞蛋酥~ 紅豆酥~ 咖哩酥) NT$15 (我食咗幾年都係覺得原味最好食)

Anytime 都有人排隊~ 除左星期四~

阿嬤精神好好~ 閒時視察業務~ 突然興起會叫賣一下~

鼓山又叫哈瑪星~ 因為日本管治過台灣有好一段時間~ 哈瑪星係日本名 (はません，Hamasen)~ 大家都係地球人~ 唔洗驚~

小小一個檔口~ 人手唔少~ 採取車輪戰術應付人潮~ 唔講得笑~ 不過打狗領事館好多陸團~ 旅遊巴唔會黎碼頭~ 但係導遊會黎買俾強人食~ 所以有時會等得耐 d~

識得食梗係即刻塞入口~ 外賣帶走已經係兩件事~ 無意思~ 唔好諗住邊行邊食喇~ 食完先行啦~

行前幾步有海之冰~ 有做功課應該知要食阿婆冰~ 但係阿婆冰行去的話應該天黑喇~ 加上我食過覺得跟本係一樣~ 水果+冰+煉奶~ 阿公定阿婆整都係一樣~ 呢頭附近亦好多間食冰~ 賣點係面盆咁大碗~ 幾廿蚊幾條友分~ 唯一要注意係水果有分時令~ 台灣南部愛文芒果非常正~ 但只限四月尾到六月中先好食~ 其他時間就算有~ 都已經扣左分~

大學生蒲點~ 所以你睇幾多青春嘅肉體~ 海之冰最多位㗎喇~ 有三個鋪位~ 仲有二樓~ 好快有得食~ 淺嘗好喇~ 唔洗食咁飽~ 仲有下場~

繼續行~ 兩邊都有得搵食~ 都係學生餐居多~ 平靚正~ 唔算特別好食~ 但平平地攪掂唔洗煩~ 學生就係要咁之麻~

呢度都有吳師傅鹵味~ 唔係推薦大家食~ 係佢地嘅辣椒醬非常勁揪~ 無辣不歡嘅朋友可以買支返去旁身~ 叫"蛇辣"~ 可以即場試下先買又得~

再前 d 就係過年期間刮中 1000 萬大獎嘅投注站~ 當然刮中嗰個並唔係我啦~ 不過大家經過~ 有興趣的話都可以玩下~

覆桌者聯盟響晒裡面~ 好易認~

呢 d 就係刮刮樂喇~ 有 NT$100~ NT$200~ NT$500~ NT$1000~ NT$2000 都有~ 即刮即知有無錢收~ 單價愈高~ 中獎機會愈大~ 試過買 NT$2000 話 100% 中獎~ 結果中 NT$500~ 咁你話係中獎定中招呢~ 亦試過買 NT$500 中 NT$5000~ 即場收錢但會扣稅~

中獎彩券所得稅課徵如下：

獎金金額	所得稅率	備註
新臺幣1~2000元	0%	免稅
新臺幣2000元以上(不含)	20%	採分離課稅，不列入個人綜合所得稅

話雖如此~ 但另外多加千分之四印花稅~

所以中 NT$5000 x 0.2 = NT$1000 彩券稅

NT$5000 x 0.004 = NT$20 印花稅

實收 NT$3980

行善最樂~ 福有油龜~ 台灣彩券係俾弱勢社群經營 (雖然未見過有弱過我嘅人開彩券行)~ 反正買個運氣玩下~ 又唔洗等開獎~ 又怕唔記得對~ 贏個旅費大家食咗佢~ 你話幾 Happy 呢~ 可以坐低慢慢玩~ 有齊架生俾你刮~ 玩法好簡單~ 當然今次又鋪咗草皮啦~ 哈哈~ 留返俾你地幫我報仇喇~

跟手轉入巷仔~ 發現有車仔麵食~ 可惜我無 quota 喇~ 留返下次~ 不過路邊車仔檔真係幾有 feel~ 希望小本經營長生不息~ 長做長有~

老闆娘都坐低嘆咖啡~ 由我攪攪震無幫襯仲謝謝我~ 人情味無價~ 強人唔會懂~

屈入巷仔梗係有目的架啦~ 就係黎食手作霜淇淋~ 你成日見我打卡就知我係粉絲啦~ 大家都可以先到佢哋 facebook fan page 睇下今日有咩口味~ 每日限定兩款~ 可以 mix 紐紋又得~

丸浜霜淇淋

營業時間 : 12:00pm - 9:00pm (賣完即止星期二休息)

一支 NT$70 打卡第二支 NT$50 (其實唔打卡都有優惠~ 不過都支持下啦~)

每日口味請瀏覽 Facebook : https://www.facebook.com/WanBingMaruHama

咁情形好明顯要咗四支超濃可可~ 可以選擇用紙杯裝~ 因為手作仔野應該無加太多化學野~ 所以溶得好快~ 有小朋友都係用紙杯好~ 雪糕筒同脆笛都一樣照跟俾你的~

無星星咁靚仔~ 不過睇得出用心製作~

真係好食架呢~ 信我啦~ 你睇佢已經開始溶喇~ 快 d lam 下先~

你睇佢食到~ 哈~

門口有凳仔坐~ 有水喉洗手~ 有紙巾用~ 夠細心~ 可以盡情享受~ 食完再行~

之前都有提過鹽珵區好多好野食架啦~ 今次集中食鼓山碼頭可以行到去嘅地方~ 附近好多單車租~ 單車可以上船過旗津~ 柞車的話要注意碼頭附近好多都係單程路~ 交通繁忙~ 要分外小心~ 閒時都同屋企人黎 tea~ 跟住去前 d 鐵道故事館外面玩下~ 無諗住飛黃騰達~ 但非常享受簡單生活~ 台灣就是剛剛好~ 唔希望有咩大改變~ 至少~ 我係咁諗~ 有興趣就黎同我一齊玩啦~

艾笠墾丁 2 - 40人專業台灣包車服務, 免費行程安排, 可指定香港人導遊