高雄 - DAZZLING Cafe (蜜糖吐司)

早排台北好紅嘅貴婦 High Tea 新寵 DAZZLING Cafe 開到黎高雄喇~ 之前已經被夾黎過~ 但不幸地因為無訂檯而撲空~ 正所謂君子報仇十年未晚~ 所以返屋企食麵包幾個月後再黎過~ 一樣堅持唔訂檯 walkin~ 即刻有位~ 證明貴婦是善變的.....

今次地點非常方便~ 三多商圈捷運站行去新光三越百貨公司只需幾分鐘腳程~ Cafe 位於新光三越 3/F~ 唔難搵~

Facebook Page : https://www.facebook.com/dazzling.cafe

高雄店
地址 : 高雄市前鎮區三多三路 213 號 3F
電話 : 07-3329090

台南店
地址 : 台南新光三越中山路 162 號 2F
電話 : 06-2232988

根據八婆雜誌透露~ DAZZLING Cafe 之所以被譽為貴婦蒲點~ 係因為老闆娘係呢位名媛孫芸芸嘅朋友~ 台灣版李冰冰~ 同時尚掛勾嘅代言人~ 你唔係唔知下嘛~ 係呀~ 其實我真係唔係好知~ 話孫芸芸成日去捧場~ 當然係台北店啦~

開宗明義話主攻貴婦 market~ 就梗係唔少得酥胸啦 (爛 gag 意思係馬卡龍~ 真正酥胸係攻貴婦老公的)~

你睇個 Logo 就知係咩料啦~ 哈哈~

其實單點價錢唔算好貴~ 有裝修嘅餐廳~ 食個 lunch 差唔多~ 就算真係黎 tea~ 亦只算錢小豪~ 未到貴婦 level~ 坐低飲杯咖啡 NT$150 左右~ 路邊 50嵐都五草野啦~

有 set~ 不過我無叫~

因為主打係蜜糖吐司~ 即係去 KFC 唔係唔食雞下嘛~ 老虎蟹都整個黎試下先啦~

之但係老土如我~ 無乜米氣落肚好似唔多掂~ 所以叫個意粉打打底~ 依~ 意粉好似唔係米做㗎喎~ 真係 Lolanto~

略有不足係想落柯打時稍有困難~ 感覺自己透明咗幾分鐘~ 可能係我一直怕隔離檯發現我無剃格甩底毛而憂心~ 所以手舉得唔夠高~ 最後我默唸 "舉高隻手~ 洗乜怕醜~" fing 咗兩秒~ 終於有人理我喇~

一人叫杯野飲~ 我個 Cappuccino 無咩特別~ 不過不失~

賤人的內子叫咗宣稱無咖啡因嘅香草布蕾鮮奶茶~ 佢話好正~ 但唔幾啱我口味~ 糖自己加~ 完全女生定位~ 讚~

上菜速度跟得上香港茶記~ 落完柯打有問咸甜食洗唔洗前後腳上~ 喂~ 茶記梗係全部一齊上啦~ 秒秒鐘幾百萬上落丫嘛~ btw 佛羅倫斯干貝蟹肉意粉幾好食~ 先唔計佛羅倫斯~ 干貝即係帶子啦~ 同蟹肉都係非常珍貴~ 稍有抽水之嫌~

叉都未柞暖~ 個吐司又到喇~ 落單時有問你要咩口感~ 可以脆 d 或者軟 d~ 我地叫正常版試試先~ 同樣話甜度唔夠自己可以加~

完全女生定位餐廳~ 深知開餐前先餵相機嘅道理~ "服務員" 會遠距離假扮做其他野~ 當你一餵飽部相機~ 想要開餐正躊躇要如何下手之際~ "服務員" 就會殷勤地過黎幫你切~ 嗰一成服務費俾得過啦~

經過專業拆解之後~ 發現裡面都已經切開細細舊~ 真係好 Lady 啊~ (台妹腔)

雖然話係貴婦 high tea 蒲點~ 但係飯市比較多人喎~ 食到咁上下回頭一望~ 大 number 位~

免女郎專用椅係咪好 Lady 呢~ 同時發現真係好多貴婦帶小朋友黎同人打牙鉸~ 所以有 bb 車停車位~ 同埋兒童餐椅餐具都有齊~ 係小朋友 welcome 嘅餐廳~

窗口梳化位幾好 hea 㗎~

亦有三五成群 corner 位~ 感覺黎 high tea 小攪生日趴~ 切個蛋糕真係 good fit~ 不過梗係最好先訂位啦~

環境氣氛係幾舒適~ 不過飯市爆滿時都幾噪~ 有茶記 feel~

台灣食飯時間同我地集慣有 d 出入~ 對想黎呢間野食嘅朋友黎講係有著數的~ 因為佢地無中場休息 (大部份台灣食肆晏晝都會落場...)~ 12:00pm - 1:00pm 係台灣正常食飯時間~ 所以我哋 1:00pm 先黎就 walkin 有位~ 差唔多食飽其他人已經散晒~

同場加映 National Geographic 寫實篇~ 美麗的吐司對扮貴婦的 Lady 黎講真係切到手軟~ 所以口感要脆 d 的話~ 前一晚就趙下 d 啞呤先好黎~ 最後呢個任務梗係我黎啦~ 要切細細舊先 match 到賤內的櫻桃小咀~ 你睇俾我蹂躪完之後嘅吐司~ 就好似被潑卸妝水之後嘅貴婦一樣... 不過切得過嘅~ 點個雪糕食係幾正~ 甜度亦啱啱好~ 唔洗再加糖漿~ 最後再次提醒各男仕~ 記得叫正常口感就好~ 除非你有生力啤咁大隻~ 或者同阿潻一樣玩氣功就可以焗燶佢先攞出黎~

如果柞車黎的話可以直接停百貨公司停車場~ 如果唔行街的話~ 磁卡直接俾 cashier 攪埋就得~ 唔洗落返一樓攪咁麻煩~

總括黎計兩條友埋單 NT$900 (約HK$250)~ 扮下貴婦 ok~ 服務質素可以接受~ d 野都幾好食~ 不過真心覺得主打係蜜糖吐司 only~ 意粉呢個價錢有更好選擇~ 地點方便~ 大家黎高雄不妨黎 high 個 tea~ 係個十分 ok 嘅選擇~ 比起什麼韓國 cafe~ 俾錢俾得順好多~

艾笠墾丁 2 - 40人專業台灣包車服務, 免費行程安排, 可指定香港人導遊