台南 - 夕遊出張所 (生日鹽)

同樣屬於安平區景點~ 但經常被忽略~ 因為夕遊出張所淨係睇個名係完全唔知佢攪乜之餘~ 地點仲要被流放至最遠個停車場嘅角落~ 概然一場黎到~ 點解唔去玩埋呢~ 


其實都係安平樹屋附近~ 只不過因為地點真係唔明顯~ 所以先咁輸蝕~ 無咩人知~ 從安平路柞車過去都係 10mins~ 

同為經歷過日治時期建築~ 保留原本日本西洋風格~ 以前個名水蛇春咁長~ 係近期先改個日本名~ 唔好睇少佢~ 夕遊出張所曾經奪得台灣 Yahoo 公開投票 Top 100 台灣景點之一~

基本上我好似無見過佢無開門~ 算係好穩陣嘅景點~ 

外面有許願樹~ 係老土 d~ 但係橋就唔怕舊~ 最緊要 d 女受丫麻~ 

寫塊牌之前有得洗手先~ 同日本神社一樣~ 要玩就跟規矩啦~ 除非諗住另有出路就自己執生~ 

塊牌要入去買~ 幾草野啫~ 買個安心啦~ 

完全日式風格~ 趟門黎~ 唔好死推~ 小心裡面有人~ 因為我哋入去前就係睇到裡面條友死命死推隻門~ 大佬~ 攪到門另一邊嘅我震晒~ 咁點影相呀~ 

入面其實影相 ok 㗎喎~ 不過假期就多人 d~ 大家就一就啦~

生日彩鹽有 366 種顏色~ 咁點解凸腳咁棧鬼呢~ 非也非也~ 咁唔係個個二月都係得廿八日㗎嘛~ 係咪~ 又有位俾你響 bb 面前威返次喇~ 仲唔快 d mark 底~ 哈~

依喂~ 有得試食~ 我其實食唔出有咩唔同~ 都係鹽囉~

大家請埋去消費~ 生日盬同生日熊一樣~ 一日一個顏色~ 真身就係咁款~ 分月份由上至下~ 由左至右~ 整齊咁排列好~

唔講其實我以為係卡片~ 一舊水三百張嗰隻~

原來每日生日都有性格分析~ 睇過自己同個女嘅~ 都覺得幾準~ 正當我起勢拆盒偷睇嘅同時~ 眼尾當然要瞄下睇檔條友有無嬲啤我啦~ 又無喎~ 任你玩~ 咁請大家自重喇~ 自由同人情味都係值得我得珍惜的~ 一個 NT$100~ 最後我買一個俾個女~ 偷睇自己嗰個掉底就走~ 咁樣良心似乎可以過到骨~ 

俾完錢回頭見到有支龍頭棍咁嘅嘢~ 好霸氣嘅風扇呀~ 

入面有好多唔同種類嘅鹽產品~ 有食得有唔食得~ 呢度又有限定霜淇淋喎~ 不過中左佢招~ 只係普通七仔雪糕上面灑 d 鹽~ 頂佢~ 害我減肥失敗多跑兩個圈~ 

佢話呢個包食得~ 我就唔係好敢食~ 如果有勇者試過~ 請同我分享下賽後報告~ 

總括黎計唔洗錢入場感覺良好~ 但入去多少都會放低幾兩~ CP 值合格~ 玩得開心嘅地方~ 值得行去睇下~ 黎台南記得唔好錯過喇~

艾笠墾丁 2 - 40人專業台灣包車服務, 免費行程安排, 可指定香港人導遊

HK Tel : 81700438

Email : info@iLoveKenting.com

Web : www.iLoveKenting.com

Facebook : http://www.facebook.com/iLovekentingHK