台南 - 四草綠色隧道 (號稱 mini 亞馬遜河生態之旅)

好多朋友都係一家大細黎玩~ 咁難得一齊黎玩梗係要照顧到每個人需要~ 大家 Happy 先係重點啦~ 所以推薦大家黎台南要去睇下號稱 mini 版台灣亞馬遜河生態之旅~ 係一個老少咸宜嘅行程~

四草其實唔遠~ 以台南必到嘅安平路為中心~ 柞車 15-20mins 就到~ 途中仲有好靈嘅姻緣廟添~ 值得放埋入一日遊行程裡面玩~ 不過始終係戶外活動~ 所以都要睇天氣行事~

去到售票處當堂選擇恐懼症發~ 因為有兩種飛~ 一個話坐竹筏 NT$150~ 一個話坐船 NT$200~ 即刻踎低問 Google~ 再打返去問旅遊業前輩~ 確定黎四草~ 識玩梗係坐竹筏啦~ 咁仲望~ 行啦~

真正未出發先興奮~ 未上筏就一人派件救生衣~ 心諗唔係咁流下麻~ 又竹筏又盛仲要著晒救生衣~ 唔通今次真係為左慳五草野台仔而觸礁?!

仲一人載頂咁嘅帽~ 真係好有 "北漏洞拉" feel...........

好在都仲有隻似樣嘅船~ 唔係真係筏~ 之但係個個都係踎響樹~ 心裡面嘅小惡魔不斷咁呼喚我~ 好想反檯~

但係開筏無耐~ 導遊表現非常專業~ 即時救返成件事~ 眼件所有一草一木佢都無所不知~ 生態旅遊重點就係要有本活字典帶你玩~ 每個地方嘅動植物都有唔同特性~ 唔係話禁電話問維基就得~ 出發唔洗一分鐘~ 即刻有勁多蟹仔同彈塗魚睇~ 正呀~

對面筏係班台灣小學生~ 好迪迪尼式咁大家 say Hi~ 心諗好少細路咁乖㗎喎~ 俾著我小學出遊咁 Happy~ 早就跳落河蛙自背蝶游兩個塘先再傾~ 足以證明台灣老師嘅霸氣高於香港好幾十倍~ 同時證實隻筏係啱小朋友玩嘅~ 大家可以放心~

大家見唔見右邊有荷蘭朋友嘅遺址~ 係呀~ 係淨返咁多咋~ 導遊叔叔話呢度係當年荷蘭人第一個上岸嘅地方~ 所以岸邊有種一種植物叫 "綠珊瑚"~ 樹黎嘅~ 有毒~ 雖然毒你唔死~ 但係棵野好脆弱~ 真係掂下就斷~ 會流 d 白色汁~ d 汁掂到你傷口的話~ 會痕癢難耐咁話~ 目的就係當地人用黎防範 d 荷蘭 Friend~ 等佢唔好咁易入村~ 好在我有聽書~ 我旁邊嗰位洞拉~ 上咗車先話乜阿叔有講過咩.... 旅程中好多植物都有掛名牌~ 大家唔好顧住訓~ 大拿拿 NT$150~ 認真 d 唔好笑~

隻筏一直行~ 導遊叔叔雖然把口唔收~ 但係唔嘈~ 無破壞到生態旅遊必需要嘅寧靜感覺~ 沿途真係好多野睇~ 導遊叔叔相信視力有 2.0 以上~ 手柞一支 laser pen~ 不停話你知邊度有野睇~ 不過同搽牛眼淚一樣~ 叫咗你搽快 d~ 唔係就走晒㗎喇~

好快就進入重點~ 綠色隧道~ 真係好靚~ 亦明白點解要踎響樹~ 同載洞拉帽~ 因為條隧道好多位都好矮~ 以我四廿二吋長腿嘅高度~ 如果唔載頂野~ 上岸個頭應該都係綠色~ 所以唔好難醒~ 聽當地人指示~ 當中有佢地嘅智慧響裡面~

所以大家唔好掛住影呀~ 最好有朋友睇水會好 d 啦~ 唔係連人帶機跌落亞馬遜河~ 真係唔講得笑㗎嘛~

估唔到河都有盡頭~ 去到尾係個水閘~ 跟住掉頭返去~ 所以唔洗急住兩邊走~ 安全第一~ 坐定定~ 一來一回兩邊風景都睇到晒~ 保證左右開弓~ OK~

企響樹進入隧道呢位就係導遊叔叔喇~ 連河邊祖墳故事都知~ 真正當地土生土長地膽~ 我上岸後有撻朵問其他職員野~ 發現佢地其實做得相當成熟~ 所以唔係好似去菲律賓咁~ 求其搵隻筏帶你去玩~ 去到盡頭條渠有水就話係 waterfall 咁離譜~ 雖然全程好期待想睇嘅~ 亞馬遜無敵大水蟒同 3D 食人魚都無出現~ 有抽水之嫌~ 不過綠色隧道交足功課~ 我好 buy~ 無叫佢回水~ 導遊叔叔落筏前仲點條路我行~ 話可以近距離睇蟹仔添~